കൊച്ചി: പള്‍സര്‍ സുനിയും കൂട്ടാളികളും നടിയെ തട്ടിക്കൊണ്ടുപോകുന്നതിന്റെ ദൃശ്യങ്ങള്‍ പൊലീസിന് ലഭിച്ചു. നടിയെ പള്‍സര്‍ സുനിയും കൂട്ടുപ്രതികളും പിന്തുടരുന്നതിന്റേയും തട്ടിക്കൊണ്ടു പോകുന്നതിന്റേയും ദൃശ്യങ്ങളാണ് ലഭിച്ചത്. നടിയെ പിന്തുടരുന്നത് കൂടാതെ വെങ്കലയിലെ ഒരു കടയില്‍ നിന്നും സുനിയും മറ്റുപ്രതികളും വെള്ളം വാങ്ങിക്കുടിക്കുന്നതിന്റെ ദൃശ്യങ്ങളും ഇതിലുണ്ട്. അതേസമയം, നടിയുടെ വീഡിയോകളും ചിത്രങ്ങളും അടങ്ങിയ മൊബൈല്‍ ഫോൺ ഇതുവരെ കണ്ടെത്താനായിട്ടില്ല.
സുനിയെ പൊലീസ് മുറയില്‍ വെച്ച് ചോദ്യം ചെയ്യരുത് എന്ന് ഡിജിപി അടക്കമുള്ള ഉന്നത ഉദ്യോഗസ്ഥരുടെ കര്‍ശന നിര്‍ദ്ദേശം അന്വേഷണ ഉദ്യോഗസ്ഥർക്ക് ലഭിച്ചിട്ടുണ്ട്. അതുകൊണ്ട് തന്നെ ഫോൺ എവിടെയാണ് ഉപേക്ഷിച്ചതെന്ന് വ്യക്തമായി പറയാതെ സുനി അന്വേഷണ ഉദ്യോഗസ്ഥരെ വട്ടം ചുറ്റിക്കുകയാണ്. ദൃശ്യങ്ങളടങ്ങിയ മൊബൈല്‍ ഫോണ്‍ തമ്മനത്തെ ഓടയില്‍ ഉപേക്ഷിച്ചുവെന്ന് ആദ്യം സുനി പറഞ്ഞെങ്കിലും പിന്നീട് ഗോശ്രീ പാലത്തില്‍ നിന്ന് കായലിലേക്ക് എറിഞ്ഞുവെന്ന് അറിയിച്ചു. എന്നാൽ വാഗമണ്ണിലേക്ക് പോകും വഴി ഫോണ്‍ കാട്ടില്‍ ഉപേക്ഷിച്ചുവെന്നാണ് അവസാനമായി സുനി പറഞ്ഞിരിക്കുന്നത്.
Post Your Comments