വിമാനം വൈകൽ തുടരുന്നു; നട്ടംതിരിഞ്ഞ് യാത്രക്കാർ

ദുബായ്: കനത്ത മൂടൽമഞ്ഞ് ദുബായ്, ഷാർജ വിമാനത്താവളങ്ങളിൽനിന്നുള്ള സർവീസുകൾ വൈകുന്നു. ഇന്നലെയും 12 വിമാനങ്ങൾ റദ്ദാക്കുകയും 33 വിമാനങ്ങൾ വൈകുകയും ചെയ്‌തു. ദുബായിൽനിന്നു വൈകിട്ടു നാലിനു കൊച്ചിയിലേക്കു പോകേണ്ട ഐഎക്‌സ് 435 വിമാനം 6.55ന് ആണ് പോയത്.പുതുവർഷം ആഘോഷിക്കാനായി വിവിധരാജ്യങ്ങളിൽ നിന്നെത്തിയവരെല്ലാം തിരിച്ചുപോകാനായി ബുദ്ധിമുട്ട് അനുഭവിക്കുകയാണ്.

ദൂരക്കാഴ്‌ച 100 മീറ്ററിൽ കുറയുന്നതാണു വിമാന സർവീസുകളെ തടസ്സപ്പെടുത്തുന്നത്. അബുദാബി, അൽഐൻ എന്നിവിടങ്ങളിലും മൂടൽമഞ്ഞ് അനുഭവപ്പെട്ടെങ്കിലും വിമാനസർവീസുകളെ കാര്യമായി ബാധിച്ചിട്ടില്ല.