കൊച്ചി: വിമാനം വൈകിയതില്‍ വിമാനത്താവളത്തില്‍ യാത്രക്കാരുടെ പ്രതിഷേധം. നെടുമ്പാശ്ശേരി വിമാനത്താവളത്തിലാണ് യാത്രക്കാര്‍ പ്രതിഷേധിച്ചത്. വിമാനം 24 മണിക്കൂര്‍ വൈകിയതോടെയാണ് യാത്രക്കാര്‍ പ്രതിഷേധവുമായി രംഗത്തെത്തിയത്. ജിദ്ദയിലേക്ക് പോകേണ്ട എയര്‍ ഇന്ത്യ വിമാനത്തിലെ യാത്രക്കാരാണ് പ്രതിഷേധിക്കുന്നത്. എഐ 963 കൊച്ചി-ജിദ്ദ വിമാനമാണ് ഇന്നലെ റദ്ദാക്കിയത്.
ഇന്നലെ വൈകുന്നേരം 5.40ന് പുറപ്പെടേണ്ട വിമാനമാണ് ഇതുവരെയും യാത്ര തുടരാത്ത അവസ്ഥയിലായത്. യന്ത്രത്തകരാറിനെത്തുടര്‍ന്ന് ഇന്നലെ സര്‍വീസ് റദ്ദാക്കിയതായി എയര്‍ ഇന്ത്യ അധികൃതര്‍ അറിയിച്ചിരുന്നു. ജിദ്ദയിലേക്ക് പുറപ്പെട്ട വിമാനം കൊച്ചി അന്താരാഷ്ട്ര വിമാനത്താവളത്തില്‍ തിരിച്ചിറക്കിയ ശേഷമാണ് വിമാനം റദ്ദാക്കിയ വിവരം എയര്‍ ഇന്ത്യ അറിയിച്ചത്.
എന്നാല്‍ ഇതുവരെയും ബദല്‍ സംവിധാനം ഏര്‍പ്പെടുത്തി യാത്രക്കാരെ അയയ്ക്കാത്തതാണ് പ്രതിഷേധത്തിന്റെ കാരണം. വിമാനം ഇന്ന് പുറപ്പെടും എന്നാണ് വിമാനത്താവള അധികൃതരുടെ വിശദീകരണം.
ഇന്നലെ വൈകിട്ട് 5.30ന് കൊച്ചിയില്‍ നിന്ന് ജിദ്ദയിലേക്ക് പറന്നുയര്‍ന്ന വിമാനം അരമണിക്കൂര്‍ മാത്രം പറന്ന് തിരിച്ചിറക്കുകയായിരുന്നു. വിമാനത്തില്‍ പോകേണ്ടിയിരുന്ന 217 യാത്രക്കാരെ ഇന്നലെ വിവിധ ഹോട്ടലുകളിലേക്ക് മാറ്റിയിരുന്നു.
Post Your Comments