സഹാരണ്‍പൂര്‍: പ്രധാനമന്ത്രി നരേന്ദ്രമോദിയെ പരിഹസിച്ച് സമാജ്‌വാദി പാര്‍ട്ടി നേതാവ് അസം ഖാന്‍. തനിക്ക് പ്രധാനമന്ത്രിയാകാനുള്ള എല്ലാ യോഗ്യതകളുമുണ്ടെന്ന് അസംഖാന്‍ പറയുന്നു. മോദിയുടെ എല്ലാ കഴിവുകളും തനിക്കുമുണ്ട്.
ചായ ഉണ്ടാക്കുക, ഡ്രം കൊട്ടുക, ഭക്ഷണം ഉണ്ടാക്കുക, വിലപിടിപ്പുള്ള വസ്ത്രം ധരിക്കുക തുടങ്ങി എല്ലാ ഗുണങ്ങളും എനിക്കുണ്ട്. കാണാനും തരക്കേടില്ല, അഴിമതിക്കാരനുമല്ല. ഇങ്ങനെയുള്ള തനിക്ക് എന്തുകൊണ്ട് പ്രധാനമന്ത്രിയായിക്കൂടാ..
താന്‍ പ്രധാനമന്ത്രിയായാല്‍ ആറു മാസത്തിനുള്ളില്‍ 130 കോടി ജനങ്ങളുടെ അക്കൗണ്ടിലും 20 ലക്ഷം രൂപ വീതം നിക്ഷേപിക്കുമെന്നും അസംഖാന്‍ പറയുന്നു. ഇത് വെറും വാക്കല്ല, വാക്കുപാലിക്കാത്തവരെ പോലെ താന്‍ പെരുമാറില്ല. താന്‍ പ്രധാനമന്ത്രിയായാല്‍ ഓരോ ഇന്ത്യക്കാരന്റെയും അക്കൗണ്ടില്‍ 15 ലക്ഷം രൂപ വീതം നിക്ഷേപിക്കുമെന്ന് പറഞ്ഞ മോദിക്കെതിരെ പ്രതികരിക്കുകയായിരുന്നു അസംഖാന്‍.
അതിര്‍ത്തിയില്‍ സംഘര്‍ഷം നടക്കുമ്പോള്‍ മോദി പാക്കിസ്ഥാനിലേക്കു ഷാളുകള്‍ കൊടുത്തയച്ചശേഷം മാങ്ങകള്‍ നിറച്ച പെട്ടികള്‍ വരുന്നതും കാത്തിരിക്കുകയാണെന്നും അസംഖാന്‍ പരിഹസിക്കുന്നു.
Post Your Comments