കേരളത്തിലെ ഇതര സംസ്ഥാന തൊഴിലാളികള്‍ക്കായി അന്ത്യോദയ ട്രെയിന്‍

ചെന്നൈ: ഇതര സംസ്ഥാന തൊഴിലാളികള്‍ക്കായി അന്ത്യോദയ പദ്ധതിയിൽ ഉൾപ്പെടുത്തി കേരളത്തിന് ഒരു സൂപ്പര്‍ ഫാസ്റ്റ് ട്രെയിന്‍ കൂടി. എറണാകുളം-ഹൗറ-എറണാകുളം അന്ത്യോദയ സൂപ്പര്‍ ഫാസ്റ്റ് എക്സ്പ്രസ് (22878/22877) ട്രെയിനാണ് ഇതര സംസ്ഥാനതൊഴിലാളികളുടെ യാത്രാസൗകര്യത്തിനായി അനുവദിച്ചിരിക്കുന്നത്. റിസർവേഷൻ ബർത്തുകൾ ഇതിൽ ലഭ്യമാകില്ല.

ചൊവ്വാഴ്ചകളില്‍ രാത്രി 12.25ന് എറണാകുളത്ത് നിന്നും ഹൗറയിലേക്കും ശനിയാഴ്ചകളില്‍ ഹൗറയിൽ നിന്ന് എറണാകുളത്തേക്കും ഈ ട്രെയിൻ സർവീസ് നടത്തും. കേരളത്തിന് അനുവദിച്ച മറ്റൊരു ട്രെയിനായ എറണാകുളം-ഹാട്ടിയ-എറണാകുളം സൂപ്പര്‍ഫാസ്റ്റ് എക്സ്പ്രസ് വ്യാഴാഴ്ചകളില്‍ രാത്രി 12.25ന് എറണാകുളത്ത് നിന്നും ഹാട്ടിയയിലേക്കും തിങ്കളാഴ്ച്ച വൈകിട്ട് 6.15 ന് ഹാട്ടിയയിൽ നിന്ന് എറണാകുളത്തേക്കും സർവീസ് നടത്തും. ഇതില്‍ റിസര്‍വേഷന്‍ സൗകര്യം ലഭ്യമാണ്. സര്‍വീസ് തുടങ്ങുന്ന തീയതി പിന്നീട് അറിയിക്കും.