ശബരിമല: ശബരിമല ശ്രീകോവിലില്‍ പൂജിച്ച അയ്യപ്പചിത്രമുള്ള സ്വര്‍ണലോക്കറ്റ് ഇന്ന് മുതല്‍ വിതരണം ചെയ്യും. വിഷു ദിനമായ ഇന്ന് രാവിലെ ദേവസ്വം മന്ത്രി വി.എന്‍. വാസവന്‍ കൊടിമരച്ചുവട്ടില്‍ ലോക്കറ്റിന്റെ വിതരണോദ്ഘാടനം നിര്‍വഹിച്ചു.
ഓണ്‍ലൈനില്‍ ബുക്ക് ചെയ്തവര്‍ക്കാണ് ലോക്കറ്റുകള്‍ വിതരണം ചെയ്തത്. സന്നിധാനത്തെ അഡ്മിനിസ്ട്രേറ്റീവ് ഓഫീസില്‍ പണം അടച്ചശേഷം ലോക്കറ്റുകള്‍ ഏറ്റുവാങ്ങാം. രണ്ടുഗ്രാം, നാലുഗ്രാം, എട്ടുഗ്രാം എന്ന രീതിയിലാണ് നിലവില്‍ ലോക്കറ്റുകളുടെ നിര്‍മാണം നടക്കുന്നത്. ബുക്കിങ് സമയത്ത് 2000 രൂപ അടയ്ക്കണം.
ഇപ്രകാരമാണ് നിരക്ക്: രണ്ടുഗ്രാമിന്റേതിന് 19,300 രൂപ. നാലു ഗ്രാമിന്റേതിന് 38,600. ഒരു പവനിന്റേതിന് 77,200. നിലവില്‍ രണ്ട് ഏജന്‍സികള്‍ക്കാണ് ലോക്കറ്റ് നിര്‍മിക്കാനുള്ള അനുമതി നല്‍കിയിട്ടുള്ളത്. തിരഞ്ഞെടുക്കപ്പെട്ട രണ്ട് ജ്വല്ലറികളില്‍ നിന്നുള്ള സ്വര്‍ണമാണ് നിലവില്‍ ലോക്കറ്റ് നിര്‍മാണത്തിനായി എടുക്കുന്നത്.
ഭാവിയില്‍ സ്വന്തമായി ലോക്കറ്റുകള്‍ നിര്‍മിച്ച് വിതരണം ചെയ്യാനാണ് ആലോചിക്കുന്നതെന്ന് ദേവസ്വം ബോര്‍ഡ് പ്രസിഡന്റ് പി.എസ്. പ്രശാന്ത് പറഞ്ഞു.
Post Your Comments