യാഷ് നായകനാകുന്ന ‘ടോക്സിക്’ സിനിമയുടെ റിലീസ് തീയതി പ്രഖ്യാപിച്ചു : ഏറെ പ്രതീക്ഷയോടെ ആരാധകർ

ബെംഗളൂരു : കന്നട സൂപ്പർ താരം യാഷ് നായകനാകുന്ന ഏറെ പ്രതീക്ഷയോടെ കാത്തിരിക്കുന്ന ചിത്രം ‘ടോക്സിക്’ 2026 മാർച്ച് 19 ന് റിലീസ് ചെയ്യും. ചിത്രത്തിന്റെ നിർമ്മാണം വൈകിയതിനാൽ റിലീസ് തീയതി അനിശ്ചിതത്വത്തിലാകുകയായിരുന്നു. എന്നിരുന്നാലും നിർമ്മാതാക്കൾ ഇപ്പോൾ റിലീസ് ഔദ്യോഗികമായി പ്രഖ്യാപിച്ചു.

കെവിഎൻ പ്രൊഡക്ഷൻസും മോൺസ്റ്റർ മൈൻഡ് ക്രിയേഷൻസും സംയുക്തമായി നിർമ്മിക്കുന്ന ‘ടോക്സിക്’ നാല് ദിവസത്തെ അവധിക്കാല വാരാന്ത്യത്തിൽ വരുന്നതിനാലാണ് മാർച്ച് 19 റിലീസ് തീയതിയായി ടീം തിരഞ്ഞെടുത്തത്. ഇത് മികച്ച ബോക്സ് ഓഫീസ് ഓപ്പണിംഗ് ഉറപ്പാക്കുന്നുണ്ട്.

കന്നഡയിലും ഇംഗ്ലീഷിലുമാണ് ചിത്രം നിർമ്മിക്കുന്നത്. ഇത് ഈ രണ്ട് ഭാഷകളിലും ചിത്രീകരിക്കുന്ന ആദ്യ ഇന്ത്യൻ ചിത്രമായി മാറുന്നു. കൂടാതെ പ്രേക്ഷകർക്കായി ഹിന്ദി, തെലുങ്ക്, തമിഴ്, മലയാളം എന്നിവയുൾപ്പെടെ ഒന്നിലധികം ഭാഷകളിലേക്ക് ഇത് ഡബ്ബ് ചെയ്യപ്പെടും.

ഗീതു മോഹൻദാസ് സംവിധാനം ചെയ്യുന്ന ‘ടോക്സിക്’ എന്ന ചിത്രത്തിൽ യാഷ് പ്രധാന വേഷത്തിൽ അഭിനയിക്കുന്നു, നയൻതാരയും കിയാര അദ്വാനിയും പ്രധാന വേഷങ്ങളിൽ അഭിനയിക്കുന്നുണ്ട്. കൂടാതെ ഇന്ത്യൻ, അന്താരാഷ്ട്ര സിനിമകളിൽ നിന്നുള്ള നിരവധി പ്രമുഖ കലാകാരന്മാർ ഈ ചിത്രത്തിൽ ഉൾപ്പെടുന്നുണ്ട്.