ചൈനാ യുദ്ധം: ഉപേക്ഷിക്കപ്പെട്ട അതിർത്തി ഗ്രാമങ്ങളെ പുനരധിവസിപ്പിക്കും: അവയെ ടൂറിസ്റ്റ് ഇടങ്ങളാക്കുമെന്നും പ്രധാനമന്ത്രി

ഡെറാഡൂൺ : 1962 ലെ ഇന്ത്യ-ചൈന യുദ്ധത്തിൽ ഉപേക്ഷിക്കപ്പെട്ട ഉത്തരാഖണ്ഡിലെ യഥാർത്ഥ നിയന്ത്രണ രേഖ (എൽഎസി) യിലുള്ള ഗ്രാമങ്ങളെ പുനരധിവസിപ്പിക്കുന്നതിനുള്ള ഒരു കാമ്പയിൻ സർക്കാർ ആരംഭിച്ചതായി പ്രധാനമന്ത്രി നരേന്ദ്ര മോദി പ്രഖ്യാപിച്ചു. ഉത്തരാഖണ് സന്ദർശനവേളയിൽ ഹർസിലിൽ നടത്തിയ പ്രസംഗത്തിലാണ് അദ്ദേഹം ഇക്കാര്യം വ്യക്തമാക്കിയത്.

1962 ലെ യുദ്ധത്തിൽ ഉത്തരകാശി ജില്ലയിലെ രണ്ട് ഗ്രാമങ്ങളെ ഒഴിപ്പിച്ചതായും അവയെ പ്രധാന വിനോദസഞ്ചാര കേന്ദ്രങ്ങളാക്കി മാറ്റാൻ സർക്കാർ പ്രവർത്തിക്കുന്നുണ്ടെന്നും പ്രധാനമന്ത്രി മോദി പറഞ്ഞു.  1962-ൽ ചൈന ഇന്ത്യയെ ആക്രമിച്ചപ്പോൾ നമ്മുടെ ഈ രണ്ട് ഗ്രാമങ്ങളും ഒഴിപ്പിക്കപ്പെട്ട കാര്യം ആളുകൾക്ക് അറിയാമായിരിക്കും. ആളുകൾ മറന്നുപോയിരിക്കാം, പക്ഷേ നമുക്ക് മറക്കാൻ കഴിയില്ലെന്ന് പ്രധാനമന്ത്രി പറഞ്ഞു.

ഈ രണ്ട് ഗ്രാമങ്ങളെയും പുനരധിവസിപ്പിക്കുന്നതിനായി ഒരു കാമ്പയിൻ ആരംഭിച്ചിട്ടുണ്ട് കൂടാതെ അവയെ പ്രധാന വിനോദസഞ്ചാര കേന്ദ്രങ്ങളാക്കി മാറ്റുന്നതിനുള്ള ശ്രമത്തിലാണെന്നും അദ്ദേഹം കൂട്ടിച്ചേർത്തു. ചൈന അതിർത്തിയിലെ ഊർജ്ജസ്വലമായ ഗ്രാമങ്ങൾ വികസിപ്പിക്കാനുള്ള ശ്രമങ്ങളുടെ ഭാഗമായാണ് ഇന്ത്യൻ സർക്കാർ ഈ സംരംഭം ഏറ്റെടുത്തിരിക്കുന്നത്. ഓപ്പറേഷൻ സദ്ഭാവനയുടെ കീഴിൽ ഇന്ത്യൻ സൈന്യം അതിർത്തി പ്രദേശ വികസനത്തിലും സജീവമായി ഏർപ്പെട്ടിട്ടുണ്ട്.

ഉത്തരാഖണ്ഡിന്റെ അതിർത്തി പ്രദേശങ്ങൾ വിനോദസഞ്ചാരത്തിൽ നിന്ന് പ്രത്യേക നേട്ടങ്ങൾ കൊയ്യുന്നുവെന്ന് ഉറപ്പാക്കുകയാണ് തങ്ങളുടെ ശ്രമം. മുമ്പ്, ഈ ഗ്രാമങ്ങളെ അവസാനത്തെ ഗ്രാമങ്ങൾ എന്നാണ് വിളിച്ചിരുന്നത്. എന്നാൽ ഞങ്ങൾ ഈ കാഴ്ചപ്പാട് മാറ്റി. ഇപ്പോൾ ഞങ്ങൾ അവയെ ആദ്യത്തെ ഗ്രാമങ്ങൾ എന്ന് വിളിക്കുന്നു. അവരുടെ വികസനത്തിനായി വൈബ്രന്റ് വില്ലേജുകൾ എന്ന പരിപാടി ആരംഭിച്ചു. ഈ മേഖലയിലെ പത്ത് ഗ്രാമങ്ങളെ ഈ പദ്ധതിയിൽ ഉൾപ്പെടുത്തിയിട്ടുണ്ടെന്നും പ്രധാനമന്ത്രി പറഞ്ഞു.

മുഖ്‍വയിലെ മാ ഗംഗയുടെ ശൈത്യകാല വസതിയിൽ പ്രാർത്ഥനകൾ നടത്തിയ ശേഷം, മുഖ്യമന്ത്രി പുഷ്കർ സിംഗ് ധാമിക്കൊപ്പം ഹർസിലിൽ ഒരു ട്രെക്ക്, ബൈക്ക് റാലിയും പ്രധാനമന്ത്രി മോദി ഫ്ലാഗ് ഓഫ് ചെയ്തു.