സ്വപ്നസാക്ഷാത്കാരത്തിന് പിന്നാലെ അടിമുടി മാറ്റത്തിനൊരുങ്ങി അയോധ്യ! ടൂറിസം മേഖലയ്ക്ക് കൂടുതൽ ഊന്നൽ നൽകാൻ സാധ്യത

രാമക്ഷേത്രമെന്ന സ്വപ്നസാക്ഷാത്കാരത്തിന് പിന്നാലെ ടൂറിസം മേഖലയിൽ കൂടുതൽ ശ്രദ്ധ പതിപ്പിക്കാനൊരുങ്ങി അയോധ്യ. വ്യവസായ, വാണിജ്യ, ടൂറിസം രംഗങ്ങളിൽ അടിമുടി മാറ്റം വരുത്താനാണ് യുപി സർക്കാറിന്റെ തീരുമാനം. അയോധ്യയെ പ്രതിവർഷം 5 കോടിയിലധികം വിനോദസഞ്ചാരികളെ ആകർഷിക്കാൻ കഴിയുന്ന ഒരു ടൂറിസ്റ്റ് ഹോട്ട്സ്പോട്ടാക്കി മാറ്റുന്നതാണ്. നിലവിൽ, 84000 കോടി രൂപയുടെ നവീകരണ പ്രവർത്തനങ്ങളാണ് അയോധ്യയിൽ നടത്തിയിട്ടുള്ളത്. ഇത് വിനോദസഞ്ചാരത്തിന്റെ വളർച്ചയ്ക്ക് കൂടുതൽ ഉത്തേജനമാകും.

2022-ൽ 32 കോടി ആഭ്യന്തര സഞ്ചാരികളാണ് ഉത്തർപ്രദേശ് സന്ദർശിച്ചത്. ഇതിൽ 2.21 കോടി പേർ അയോധ്യയും സന്ദർശിച്ചു. എസ്ബിഐ റിപ്പോർട്ട് പ്രകാരം, അയോധ്യയിലെ രാമക്ഷേത്രം നിർമ്മാണവും യുപി സംസ്ഥാന സർക്കാർ സംരംഭങ്ങളും ഈ വർഷം അവസാനത്തോടെ സംസ്ഥാനത്തെ വിനോദസഞ്ചാര മേഖലയുടെ ചെലവ് 4 ലക്ഷം കോടി രൂപയായി ഉയർത്തുന്നതാണ്. ഇത് 2024-25 സാമ്പത്തിക വർഷത്തിൽ സംസ്ഥാനത്തിന്റെ നികുതി വരുമാനം 25,000 കോടി രൂപ വരെ അധികമായി ലഭ്യമാക്കാൻ സഹായിക്കും. വിനോദസഞ്ചാര മേഖലയുടെ വളർച്ച അയോധ്യ കേന്ദ്രീകരിച്ച് പ്രവർത്തിക്കുന്ന ഹോസ്പിറ്റാലിറ്റി, ട്രാവൽ, ടൂറിസം എന്നീ മേഖലകളിലെ ഓഹരികൾ ഉയർത്താൻ സഹായിക്കുന്നതാണ്.

Also Read: രാമക്ഷേത്രം നിര്‍മിച്ചത് നിയമമനുസരിച്ച്, വൈകിയതില്‍ രാമന്‍ ക്ഷമിക്കും: പ്രധാനമന്ത്രി