അവർ മൂന്ന് പേര് ടീമിലുണ്ടെങ്കിൽ ഹർദിക് പാണ്ഡ്യയ്ക്ക് ഒന്നും എളുപ്പമാകില്ല: ഇർഫാൻ പത്താൻ

രോഹിതും ബുംറയും സൂര്യകുമാറും ഉള്ള ടീമിനെ നയിക്കാനുള്ള കപ്പാസിറ്റി മുംബൈ ഇന്ത്യൻസിന്റെ പുതിയ നായകൻ ഹർദിക് പാണ്ഡ്യയ്ക്ക് ഇല്ലെന്ന് മുൻ ഇന്ത്യൻ താരം ഇർഫാൻ പത്താൻ. ഗുജറാത്ത് ടൈറ്റൻസിൽ നിന്ന് 15 കോടി രൂപയ്ക്ക് മുംബൈ എത്തിച്ച ഹർദിക് മുംബൈയുടെ നായകൻ ആയതോടെ വിവാദങ്ങൾ തലപൊക്കിയിരുന്നു.

‘എന്റെ കാഴ്ചപ്പാടിൽ, രോഹിത് ശർമ്മ ടീമിൽ ഒരു സുപ്രധാന സ്ഥാനം വഹിക്കുന്നു. എന്നെ സംബന്ധിച്ചിടത്തോളം, മുംബൈ ഇന്ത്യൻസിൽ രോഹിത് ശർമ്മയുടെ സ്ഥാനം സിഎസ്‌കെയിലെ ധോണിയുടെ റോളുമായി താരതമ്യപ്പെടുത്താവുന്നതാണ്. ക്യാപ്റ്റനെന്ന നിലയിൽ, രോഹിത് കഠിനാധ്വാനം ചെയ്യുകയും വിലയേറിയ സംഭാവനകൾ നൽകുകയും ചെയ്തു. ടീം മീറ്റിംഗുകളിൽ എപ്പോഴും സജീവമായ അദ്ദേഹം മികച്ച ക്യാപ്റ്റനാണ്, പ്രത്യേകിച്ച് ബൗളർമാർക്ക്.

കഴിഞ്ഞ വർഷം പോലും ആർച്ചറുടെ ഫോമും ബുംറയുടെ അഭാവവും പോലുള്ള വെല്ലുവിളികൾക്കൊപ്പം, ക്യാപ്റ്റനെന്ന നിലയിൽ രോഹിത്തിന് മികച്ച ഐപിഎൽ സീസൺ ആയിരുന്നു. സൂര്യകുമാർ ബുംറ, രോഹിത് തുടങ്ങിയവർ ഉള്ള ടീമിനെ ഈ ബുദ്ധിമുട്ടേറിയ സാഹചര്യങ്ങൾ നയിക്കാൻ ഹർദിക് പാടുപെടും. എംഐയുടെയും ഹർദിക്കിന്റെയും മാനേജ്മെന്റിനെ ആശ്രയിച്ചിരിക്കും ഫലം. ഇത് അദ്ദേഹത്തിന് എളുപ്പമുള്ള യാത്രയല്ല’, ഇർഫാൻ കൂട്ടിച്ചേർത്തു.

രോഹിത് ശർമ്മ തന്റെ ക്യാപ്റ്റൻസിയിൽ മുംബൈ ഇന്ത്യൻസിനെ അഞ്ച് കിരീട വിജയങ്ങളിലേക്ക് നയിച്ചു. ഐപിഎൽ 2013 സീസണിന്റെ മധ്യത്തിൽ റിക്കി പോണ്ടിംഗിൽ നിന്ന് ചുമതലയേറ്റ രോഹിത്, ഫൈനലിൽ CSKയെ പരാജയപ്പെടുത്തി ടീമിനെ അവരുടെ കന്നി കിരീടത്തിലേക്ക് നയിച്ചു.