‘രണ്ട് പേരെ ഉള്ളോ?’: സൂര്യകുമാർ യാദവിന്റെ വാർത്ത സമ്മേളനത്തിൽ പങ്കെടുക്കാനെത്തിയത് രണ്ട് മാധ്യമപ്രവർത്തകർ!

ലോകകപ്പ് ക്ഷീണം സത്യമെന്ന് വ്യക്തമാകുന്ന ചിത്രമാണ് പുറത്തുവരുന്നത്. ലോകകപ്പ് പരാജയം പങ്കെടുക്കുന്ന കളിക്കാർക്കും സപ്പോർട്ട് സ്റ്റാഫിനും മാത്രമല്ല, അത് കാണുന്നവർക്കും ഏൽപ്പിച്ച ആഘാതം വലുതാണ്. വിശാഖപട്ടണത്ത് ഓസ്‌ട്രേലിയയ്‌ക്കെതിരായ ട്വന്റി-20 പരമ്പര-ഉദ്ഘാടനത്തിന് മുന്നോടിയായുള്ള ഇന്ത്യയുടെ മത്സരത്തിന് മുമ്പുള്ള പത്രസമ്മേളനത്തിൽ ആകെ പങ്കെടുത്തത് രണ്ട് റിപ്പോർട്ടർമാർ മാത്രമാണ്.

ഈ പരമ്പരയ്ക്കുള്ള ഓസ്‌ട്രേലിയൻ ക്യാപ്റ്റൻ മാത്യു വെയ്‌ഡുമായി ഒരു പത്രസമ്മേളനവും ബുധനാഴ്ച ഉച്ചയ്ക്ക് ഷെഡ്യൂൾ ചെയ്‌തിരുന്നുവെങ്കിലും അത് നടന്നില്ല. “രണ്ടു പേർ മാത്രമാണോ?” ബുധനാഴ്ച നടന്ന നാല് മിനിറ്റ് നീണ്ട പ്രസ് മീറ്റ് അവസാനിപ്പിക്കുന്നതിന് മുമ്പ് അഞ്ച് മത്സര ടി20 ഐ പരമ്പരയ്ക്കുള്ള ഇന്ത്യൻ ക്യാപ്റ്റൻ സൂര്യകുമാർ യാദവ് ചോദിച്ചു. ചിരിയോടെയാണെങ്കിലും അതിൽ അമ്പരപ്പുണ്ടായിരുന്നു.

വാർത്താ ഏജൻസികളായ പിടിഐയിൽ നിന്നും എഎൻഐയിൽ നിന്നുമുള്ള രണ്ട് റിപ്പോർട്ടർമാർ മാത്രമായിരുന്നു സൂര്യകുമാറിനെ പത്രസമ്മേളനത്തിൽ പങ്കെടുക്കാനെത്തിയത്. ഇരുവരും മാറിമാറി സൂര്യകുമാറിനോട് ഒന്നിലധികം ചോദ്യങ്ങൾ ചോദിച്ചു. അധികം വൈകാതെ ചോദ്യങ്ങൾ അവസാനിച്ചു. ലോകകപ്പിനിടെ, ഇന്ത്യയുടെ ഓരോ പത്രസമ്മേളനവും 100-ലധികം മാധ്യമപ്രവർത്തകരെ ആകർഷിച്ചിരുന്നു.