കൊച്ചി കോർപ്പറേഷനിൽ നിന്നും പെര്‍മിറ്റെടുത്ത് വീട് നിർമിക്കാമെന്ന് പറഞ്ഞ് ലക്ഷങ്ങള്‍ വാങ്ങി മുങ്ങി: പ്രതി പിടിയില്‍ 

കൊച്ചി: കൊച്ചി കോർപ്പറേഷനിൽ നിന്നും പെര്‍മിറ്റെടുത്ത് വീട് വച്ച് നൽകാമെന്ന് പറഞ്ഞ് ലക്ഷങ്ങള്‍ വാങ്ങി മുങ്ങിയ കേസിലെ പ്രതി പിടിയിൽ. തോപ്പുംപടി സ്വദേശിയുടെ കൈയ്യിൽ നിന്നും 11,25,000 രൂപ വാങ്ങി മുങ്ങിയ കേസില്‍ തൃശൂർ ആളൂർ കൊമ്പൊടിഞ്ഞമാക്കൽ പുത്തൂർ വീട്ടിൽ പിബി പ്രസാദ് (44) ആണ് തോപ്പുംപടി പോലീസിന്‍റെ പിടിയിലായത്.

പണം വാങ്ങിയ ശേഷം ഒളിവിൽ കഴിഞ്ഞിരുന്ന പ്രതിയെ മൊബൈൽ ടവർ കേന്ദ്രീകരിച്ചും മറ്റും നടത്തിയ അന്വേഷണത്തിന് ഒടുവിലാണ് പിടികൂടിയത്. തൃശൂർ ഭാഗത്തു നിന്നും ആണ് ഇയാൾ പിടിയിലായത്.

പ്രസാദിനെതിരെ സമാന രീതിയിലുള്ള കുറ്റത്തിന് അഞ്ച് കേസുകൾ ഇരിങ്ങാലക്കുട പൊലീസ് സ്റ്റേഷനിലും ഒരു കേസ് അങ്കമാലി പൊലീസ് സ്റ്റേഷനിലും രജിസ്റ്റർ ചെയ്തിട്ടുണ്ടെന്ന് പൊലീസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാന്‍ഡ് ചെയ്തു.