കൊച്ചി: കൊച്ചി ആലുവയിൽ യുവാക്കളെ നടുറോഡിൽ ക്രൂരമായി മർദ്ദിച്ച സംഭവത്തിൽ രണ്ട് പേരെ പൊലീസ് അറസ്റ്റ് ചെയ്തു. കാറും ഓട്ടോറിക്ഷയും തമ്മിൽ ഉരസിയത് ചോദ്യം ചെയ്തതിനെ തുടര്‍ന്നാണ് മൂന്ന് പേർ ചേർന്ന് രണ്ട് യുവാക്കളെ തല്ലിച്ചതച്ചത്.
സംഭവവുമായി ബന്ധപ്പെട്ട് മുഖ്യപ്രതികളായ വിഷ്ണു, ടിബിൻ എന്നിവരെ പോലീസ് അറസ്റ്റ് ചെയ്തു.
ഏലൂക്കര സ്വദേശി നഫീസിനേയും സുഹൃത്ത് ബിലാലിനേയും ഓട്ടോറിക്ഷ ഡ്രൈവറും സംഘവും ചേർന്ന് ക്രൂരമായി മർദ്ദിക്കുകയായിരുന്നു. നടുറോഡിൽ കല്ലും വടിയും കൊണ്ടായിരുന്നു മർദ്ദനം. സമീപത്ത് കൂടിയവർ ഇവരെ പിടിച്ചുമാറ്റാൻ ശ്രമിച്ചെങ്കിലും വീണ്ടും മർദ്ദനം തുടരുകയായിരുന്നു.
കാറിൽ ഓട്ടോറിക്ഷ ഉരസിയതിന് ശേഷം ഓട്ടോറിക്ഷ നിർത്താതെ പോകുകയായിരുന്നു. ഇത് ചോദ്യം ചെയ്തതാണ് മർദ്ദനത്തിന് ഇടയാക്കിയത്. ഇവരോടൊപ്പമുണ്ടായിരുന്ന മറ്റൊരാൾക്ക് വേണ്ടി പൊലീസ് അന്വേഷണം ഊർജിതമാക്കിയിട്ടുണ്ട്. മറ്റ് നിരവധി കേസുകളിലെ പ്രതികളാണ് പിടിയിലായവരെന്നാണ് വിവരം.
Post Your Comments