കറുകച്ചാല്‍: ബാറിനുള്ളിലുണ്ടായ സംഘര്‍ഷത്തെത്തുടര്‍ന്ന് യുവാവിനെ കൊലപ്പെടുത്താന്‍ ശ്രമിച്ച കേസില്‍ നാലുപേർ അറസ്റ്റിൽ. മാടപ്പള്ളി പെരുമ്പനച്ചി ഭാഗത്ത് കിഴക്കേപുരയ്ക്കല്‍ വിഷ്ണു ഹരികുമാര്‍ (അമ്പാടി -22), മാടപ്പള്ളി പെരുമ്പനച്ചി ഭാഗത്ത് മരുതുപറമ്പില്‍ ബിനു ജോസഫ് (41), മാടപ്പള്ളി മാമ്മൂട് വഴിപ്പടി ഭാഗത്ത് ഓവേലില്‍ ബിബിന്‍ ആന്‍റണി (25), മാടപ്പള്ളി പെരുമ്പനച്ചി പുന്നാച്ചിറ ഭാഗത്ത് മൂലയില്‍ ബെറ്റോ ടോം (21) എന്നിവരെയാണ് അറസ്റ്റ് ചെയ്തത്. കറുകച്ചാല്‍ പൊലീസ് ആണ് ഇവരെ അറസ്റ്റ് ചെയ്തത്.
ശനിയാഴ്ച രാത്രി എട്ടിനാണ് കേസിനാസ്പദമായ സംഭവം. കറുകച്ചാല്‍ ടൗണ്‍ ഭാഗത്തുള്ള ബാറിലിരുന്ന് മദ്യപിക്കുകയായിരുന്ന ഇവര്‍ ഉച്ചത്തില്‍ സംസാരിച്ച് പരസ്പരം ചീത്തവിളിച്ചു. ഇതു സമീപത്തെ ടേബിളിലിരുന്ന വാകത്താനം പുത്തന്‍ചന്ത സ്വദേശിയായ യുവാവ് നോക്കിയതിലുള്ള വിരോധം മൂലം ഇവര്‍ സംഘം ചേര്‍ന്ന് യുവാവിനെ ബിയര്‍ കുപ്പി പൊട്ടിച്ചു കുത്താന്‍ ശ്രമിക്കുകയും കുപ്പികൊണ്ട് തലയ്ക്ക് അടിച്ച് കൊലപ്പെടുത്താന്‍ ശ്രമിക്കുകയുമായിരുന്നു. തലയ്ക്കു സാരമായി പരിക്കേറ്റ യുവാവിനെ ആശുപത്രിയില്‍ ചികിത്സയിലാണ്.
യുവാവിന്‍റെ പരാതിയിൽ കറുകച്ചാല്‍ പൊലീസ് കേസ് രജിസ്റ്റര്‍ ചെയ്യുകയും അന്വേഷണ സംഘം ഇവരെ പിടികൂടുകയുമായിരുന്നു. പ്രതികളായ ബിബിന്‍ ആന്‍റണിക്കും വിഷ്ണുവിനുമെതിരെ തൃക്കൊടിത്താനം സ്റ്റേഷനിൽ കേസുകളുണ്ടെന്ന് പൊലീസ് പറഞ്ഞു.
എസ്എച്ച്ഒ കെ.എം. മഹേഷ് കുമാര്‍, എസ്‌ഐമാരായ ആര്‍. അനില്‍കുമാര്‍, ജോണ്‍സണ്‍ ആന്‍റണി, സിപിഒമാരായ സുരേഷ്, രഞ്ജിത്ത്, നിയാസ് എന്നിവരും അന്വേഷണ സംഘത്തിലുണ്ടായിരുന്നു.
Post Your Comments