അശ്ലീല സന്ദേശം അയച്ച യുവാവിനെ കൊച്ചിയിലേക്ക് വിളിച്ച് വരുത്തി എട്ടിന്റെ പണി കൊടുത്ത് ഹനാൻ

നടിയായും മോഡലായും സോഷ്യൽ മീഡിയ ഇൻഫ്ലുവെൻസറായും പ്രശസ്തയാണ് ഹനാൻ. മൊബൈലിൽ അശ്ലീല ദൃശ്യങ്ങളും മെസേജുകളുമയച്ച യുവാവിനെ പിടിച്ച് പോലീസിൽ ഏൽപ്പിച്ച് ഹനാൻ. കുമ്പളങ്ങി സ്വദേശി ജോസഫ് ആണ് പിടിയിലായത്. തന്റെ ഫോണിലേക്ക് അശ്ളീല സന്ദേശമയച്ച ഇയാളെ ഹനാൻ കൊച്ചിയിലേക്ക് വിളിച്ച് വരുത്തുകയായിരുന്നു. ശേഷം, പൊലീസിന് കൈമാറി. ഹനാന്റെ ധൈര്യത്തിനും ധ്രുതഗതിയിലുള്ള ഇടപെടലിനും കൈയ്യടിക്കുകയാണ് സോഷ്യൽ മീഡിയ.

നേരത്തെ, ജലന്തറിലേക്കുള്ള ട്രെയിൻ യാത്രയ്ക്കിടെ തന്നെ കടന്നുപിടിച്ചയാൾക്ക് നേരെ ഹനാൻ ശബ്ദമുയർത്തിയിരുന്നു. ട്രെയിൻ യാത്രക്കിടയിൽ മദ്യലഹരിയിലുള്ള ആൾ ശരീരത്ത് കടന്നുപിടിച്ചെന്നും യാത്രക്കാർ അപമര്യാദയായി പെരുമാറിയെന്നുമായിരുന്നു ഹനാൻ പറഞ്ഞത്. ഒരാൾ യാത്രയ്ക്കിടെ ആക്രമിക്കാൻ ശ്രമിച്ചുവെന്നും തുടർന്ന് സ്വയരക്ഷയ്ക്കായി സംഘം പരസ്യമായി മദ്യപിച്ചതു വിഡിയോയിൽ പകർത്തിയതായും ഹനാൻ പറയുന്നു. കൂടാതെ സംഭവം അറിഞ്ഞെത്തിയ പോലീസും മോശമായാണ് പെരുമാറിയതെന്ന് ഹനാൻ ആരോപിച്ചു.

ജലന്തറിൽ ഒരു പരീക്ഷ എഴുതാൻ പോകുന്ന വഴിക്കാണ് ഹനാന് ദുരനുഭവം ഉണ്ടായത്. ഹനാന്റെ വിഡിയോ ശ്രദ്ധയിൽപ്പെട്ട പോലീസ് സ്ഥലത്ത് എത്തി. എന്നാൽ, അക്രമികളെ കസ്റ്റഡിയിലെടുക്കുന്നതിന് പകരം തന്നോട് ട്രെയിനിൽ നിന്ന് ഇറങ്ങാനാണ് പോലീസ് ആവശ്യപ്പെട്ടതെന്ന് ഫേസ്ബുക്കിൽ പങ്കുവെച്ച് വിഡിയോയിൽ ഹനാൻ ആരോപിച്ചിരുന്നു.