പ്രമുഖ ബാങ്കുകളുടെ പുതിയ മിനിമം ബാലൻസ് അറിയാം…

രാജ്യത്ത് നിലവില്‍ ഒരു ബാങ്ക് അക്കൗണ്ടെങ്കിലും ഇല്ലാതെ പറ്റില്ലെന്ന തരത്തിലാണ് കാര്യങ്ങൾ നീങ്ങുന്നത്. എന്നാൽ അക്കൗണ്ടുകളിലേക്ക് എത്തുമ്പോൾ വില്ലനാകുന്നത് മിനിമം ബാലൻസ് തന്നെ. രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐയിൽ വരെ മിനിമം ബാലൻസ് നിബന്ധനയുണ്ട്. സീറോ ബാലൻസ് അക്കൗണ്ടുകൾ ബാങ്കുകൾ വാഗ്ദാനം ചെയ്യുന്നുണ്ടെങ്കിലും എല്ലാവർക്കും ഇതു ലഭ്യമല്ല. അതിനാൽ തന്നെ പിഴ ഒഴിവാക്കാൻ ഉപയോക്താക്കൾ സേവിംഗ്‌സ് അക്കൗണ്ടിൽ മിനിമം ബാലൻസ് നിലനിർത്തേണ്ടതുണ്ട്.

ഗ്രാമം, നഗരം, അർദ്ധ നഗരം, മെട്രോ എന്നിവിടങ്ങളിൽ ബാങ്കുകളുടെ മിനിമം ബാലൻസ് നിബന്ധനകളിൽ മാറ്റമുണ്ട്. ചില മുൻനിര ബാങ്കുകളുടെ പ്രതിമാസ മിനിമം ബാലൻസ് തുക എത്രയെന്ന് അറിയാം…

കൊവിഡിനെ തുടർന്ന് 2020 മാർച്ചിൽ എസ്ബിഐയുടെ അടിസ്ഥാന സേവിംഗ്സ് അക്കൗണ്ടുകളിലെ മിനിമം ബാലൻസ് നിബന്ധന ഒഴിവാക്കി. ഇതിനു മുമ്പ് മെട്രോ നഗരങ്ങളിലെ മിനിമം ബാലൻസ് 3,000 രൂപയും, അർദ്ധ നഗരം, ഗ്രാമം എന്നിവിടങ്ങളിൽ യഥാക്രമം 2,000 രൂപയും 1,000 രൂപയും ആയിരുന്നു. ഈ തുക അക്കൗണ്ടിൽ സൂക്ഷിക്കാത്തവരിൽ നിന്നു മാസം 5 രൂപ മുതൽ 15 രൂപവരെയാണ് പിഴ ഈടാക്കിയിരുന്നത്. പ്രതിമാസം ശരാശരി ഒരു ലക്ഷം രൂപ ബാലൻസ് നിലനിർത്തുന്ന ഉപഭോക്താക്കൾക്ക് ഓരോ മാസവും പരിധിയില്ലാത്ത സൗജന്യ എടിഎം പിൻവലിക്കലിന് അർഹതയുണ്ട്. എന്നാല്‍, ഒഴിവാക്കിയ മിനിമം ബാലൻസ് നിബന്ധന ഉടനെ തിരിച്ചെത്തിയേക്കും.

നഗരങ്ങളിലും, മെട്രോകളിലുള്ള എച്ച്ഡിഎഫ്‌സി ഉപയോക്താക്കൾ മാസം ശരാശരി 10,000 രൂപ മിനിമം ബാലൻസ് അക്കൗണ്ടിൽ നിലനിർത്തേണ്ടതുണ്ട്. അർദ്ധ നഗര പ്രദേശങ്ങളിലെ ഏറ്റവും കുറഞ്ഞ പ്രതിമാസ പരിധി 5,000 രൂപയാണ്. ഗ്രാമീണ മേഖലയിൽ ഉപഭോക്താക്കൾ ത്രൈമാസാടിസ്ഥാനത്തിൽ 2,500 രൂപയാണ് മിനിമം ബാലൻസ് കരുതേണ്ടത്.

ഐസിഐസിഐ ബാങ്കിന്റെ റെഗുലർ സേവിംഗ്സ് അക്കൗണ്ട് ഉടമകൾ മെട്രോ, നഗര പ്രദേശങ്ങളിൽ 10,000 രൂപയും, അർദ്ധ നഗരപ്രദേശങ്ങളിൽ 5000 രൂപയും, ഗ്രാമപ്രദേശങ്ങളിൽ 2000 രൂപയും മാസാടിസ്ഥാനത്തിൽ മിനിമം ബാലൻസ് സൂക്ഷിക്കണം. ഇതിൽ വീഴ്ച വരുത്തുന്നവർക്ക് കുറവ് വരുന്ന മിനിമം ബാലൻസിന്റെ 6 ശതമാനം അല്ലെങ്കിൽ 500 രൂപയാണ് പിഴ. ലോകമെമ്പാടുമുള്ള ബാങ്കിന്റെ എല്ലാ ശാഖകളിലെയും സേവിംഗ്‌സ് അക്കൗണ്ടുകൾക്ക് പിഴ ബാധകമാണ്.

നഗര പ്രദേശങ്ങളിലെ പഞ്ചാബ് നാഷണൽ ബാങ്ക് ശാഖകളിൽ സേവിംഗ്‌സ് അക്കൗണ്ട് ഉടമകൾ ത്രൈമാസ അടിസ്ഥാനത്തിൽ 20,000 രൂപ ബാലൻസ് സൂക്ഷിക്കേണ്ടതുണ്ട്. അർദ്ധ നഗരപ്രദേശങ്ങളിൽ യഥാക്രമം 1000 രൂപയും ഗ്രാമപ്രദേശങ്ങളിൽ 500 രൂപയുമാണ് മിനിമം ത്രൈമാസ ശരാശരി ബാലൻസ്.

കൊട്ടക് മഹീന്ദ്ര ബാങ്ക് സേവിംഗ്സ് അക്കൗണ്ട് ഉടമകൾ മെട്രോ പ്രദേശങ്ങളിൽ ശരാശരി 10,000 രൂപയും, മെട്രോ ഇതര മേഖലകളിൽ 5,000 രൂപയും പ്രതിമാസ ബാലൻസ് സൂക്ഷിക്കണം. ഇല്ലെങ്കില്‍, കുറവുള്ള തുകയുടെ 6% പിഴ ചുമത്തും.