ആലപ്പുഴയില്‍ സ്‌കൂൾ ബസിന് പിറകിൽ ബൈക്കിടിച്ച് മൂന്ന് യുവാക്കൾ മരിച്ചു

ആലപ്പുഴ: ആലപ്പുഴയില്‍ നിർത്തിയിട്ടിരുന്ന സ്‌കൂൾ ബസിന് പിറകിൽ ബൈക്കിടിച്ച് മൂന്ന് യുവാക്കൾ മരിച്ചു. ആലപ്പുഴ അരൂരിലാണ് സംഭവം. അഭിജിത്ത്, ആൽവിൻ, ബിജോയ് വർഗീസ് എന്നിവരാണ് മരിച്ചത്. ഇവർ അരൂർ സ്വദേശികളാണെന്നാണ് വിവരം.

ബൈക്ക് അമിത വേഗത്തിൽ ഓടിച്ചതാണ് അപകടത്തിന് കാരണമായതെന്നാണ് കരുതുന്നത്. ഡ്യൂക്ക് ബൈക്കിലാണ് യുവാക്കൾ സഞ്ചരിച്ചിരുന്നത്. ഇടിയുടെ ആഘാതത്തിൽ ബൈക്ക് പൂർണമായും തകർന്നു.

സംഭവസ്ഥലത്ത് തന്നെ മൂന്ന് പേരും മരിച്ചിരുന്നു. അമിതവേഗത്തിൽ വരുന്നതിനിടെ ബൈക്കിന്റെ നിയന്ത്രണം വിട്ട് ബസിൽ ഇടിച്ചതാകാമെന്നാണ് പോലീസ് കരുതുന്നത്.