ചൈനയും ഇന്ത്യയും പരസ്പരം പ്രധാനപ്പെട്ട അയൽക്കാർ: ദ്രൗപതി മുർമുവിന് ആശംസകൾ അറിയിച്ച് ഷി ജിൻപിംഗ്

ബെയ്‌ജിംഗ്: ഇന്ത്യയുടെ 15-ാമത് പ്രസിഡന്റായി സത്യപ്രതിജ്ഞ ചെയ്ത ദ്രൗപതി മുർമുവിന് ചൈനീസ് പ്രസിഡന്റ് ഷി ജിൻപിംഗ് ആശംസകൾ അറിയിച്ചു. രാഷ്ട്രീയ പരസ്പര വിശ്വാസം വർധിപ്പിക്കുന്നതിനും അഭിപ്രായ വ്യത്യാസങ്ങൾ ശരിയായി കൈകാര്യം ചെയ്യുന്നതിനും ഉഭയകക്ഷി ബന്ധങ്ങൾ ശരിയായ പാതയിൽ മുന്നോട്ട് കൊണ്ടുപോകുന്നതിനും മുർമുവുമായി ചേർന്ന് പ്രവർത്തിക്കാൻ തയ്യാറാണെന്ന് ഷി ജിൻപിംഗ് തന്റെ അഭിനന്ദന സന്ദേശത്തിൽ വ്യക്തമാക്കി.

ഇന്ത്യ-ചൈന ബന്ധങ്ങൾക്ക് താൻ വലിയ പ്രാധാന്യമാണ് നൽകുന്നതെന്നും ഷി ജിൻപിംഗ് പറഞ്ഞു. ചൈനയും ഇന്ത്യയും പരസ്പരം പ്രധാനപ്പെട്ട അയൽക്കാരാണെന്നും സുസ്ഥിരമായ ബന്ധം ഇരു രാജ്യങ്ങളുടെയും ജനങ്ങളുടെയും അടിസ്ഥാന താൽപ്പര്യങ്ങൾക്ക് അനുസൃതമാണെന്നും ഷി ജിൻപിംഗ് ചൂണ്ടിക്കാട്ടി.

കഴിഞ്ഞ ഒരു വർഷത്തിനിടെ ചൈനീസ് പ്രസിഡന്റിന്റെ ഇന്ത്യയുമായുള്ള ആദ്യ ആശയവിനിമയമാണ് പ്രസിഡന്റ് മുർമുവിന് അയച്ച അഭിനന്ദന സന്ദേശം. 2021 ഏപ്രിൽ 30 ന്, കോവിഡിന്റെ മാരകമായ രണ്ടാം തരംഗം ഇന്ത്യയിൽ വ്യാപിച്ചപ്പോൾ, ഇന്ത്യയുമായുള്ള പാൻഡെമിക് വിരുദ്ധ സഹകരണം ശക്തിപ്പെടുത്തുന്നതിന് പിന്തുണ വാഗ്ദാനം ചെയ്ത് ഷി ജിൻപിംഗ്, പ്രധാനമന്ത്രി നരേന്ദ്ര മോദിക്ക് കത്തെഴുതിയിരുന്നു.