മുംബൈ: രാജ്യത്തിന്റെ മുഴുവൻ ശ്രദ്ധാകേന്ദ്രമാകുകയാണ് ടോളിവുഡ് ചിത്രമായ മേജർ. ആദിവി ശേഷ് നായകനാകുന്ന ഈ ചിത്രം ഐതിഹാസിക ജീവിതം നയിച്ച എൻഎസ്ജി കമാൻഡോ മേജർ സന്ദീപ് ഉണ്ണികൃഷ്ണന്റെ കഥ പറയുന്നു.
അതേസമയം, ഇന്ത്യൻ കമാൻഡോകൾ തനിക്ക് ബഹുമാനസൂചകമായി നൽകിയ മെഡലിന്റെ വിശേഷങ്ങളാണ് ശേഷിന് പങ്കുവെക്കാനുള്ളത്. മുംബൈ നാഷണൽ സെക്യൂരിറ്റി ഗാർഡ് മന്ദിരത്തിൽ ഈയിടെ റിലീസിന് മുന്നോടിയായി ചിത്രം പ്രദർശിപ്പിച്ചിരുന്നു. 312 കമാൻഡോകളും അവരുടെ കുടുംബവും ചിത്രം കാണുകയുണ്ടായി.
നടന്റെ അഭിനയം ഇഷ്ടപ്പെട്ട ഉന്നത കമാൻഡോ ഉദ്യോഗസ്ഥർ, അദ്ദേഹത്തെ ഹെഡ് ക്വാർട്ടേഴ്സിലേക്ക് വിളിപ്പിക്കുകയും, ശേഷം ആദരസൂചകമായി മെഡൽ കൈമാറുകയുമായിരുന്നു. തനിക്ക് ലഭിച്ച ആ മെഡൽ ഓസ്കാറിനേക്കാൾ വലുതാണെന്നാണ് താരം പറയുന്നത്.
തെലുങ്ക് സൂപ്പർ താരം മഹേഷ് ബാബുവാണ് ചിത്രം നിർമ്മിച്ചിരിക്കുന്നത്. സായി മഞ്ജരേക്കർ, രേവതി, പ്രകാശ് രാജ് എന്നിവരാണ് മറ്റുള്ള പ്രധാന അഭിനേതാക്കൾ. ജൂൺ മൂന്നിനാണ് ചിത്രം ഇന്ത്യയിൽ റിലീസ് ചെയ്യുന്നത്. തെലുങ്കിനെ കൂടാതെ മലയാളം, ഹിന്ദി തുടങ്ങി നിരവധി ഭാഷകളിൽ ചിത്രം റിലീസ് ചെയ്യുന്നുണ്ട്.
Post Your Comments