പ്രണയ വിവാഹം ജീവിതത്തിൽ കയ്‌പേറിയ അനുഭവങ്ങൾ സമ്മാനിച്ചപ്പോഴും മക്കളെ ഓർത്ത് വർഷങ്ങളോളം സഹിച്ച് മുന്നോട്ട് പോയി, പിന്നീട് ഒരു ഘട്ടത്തിൽ ഭർത്താവുമായുള്ള ജീവിതം ഉപേക്ഷിച്ച് പെരുവഴിയിലേക്കിറങ്ങുകയും ചെയ്ത യുവതിയുടെ അസാധാരണ ജീവിത കഥയാണ് സോഷ്യൽ മീഡിയയിൽ ശ്രദ്ധേയമാകുന്നത്. ഹ്യൂമൻസ് ഓഫ് ബോംബെയിൽ യുവതി തന്നെയാണ് തന്റെ അനുഭവ കഥ പങ്കുവെച്ചത്. ആ കഥ ഇങ്ങനെ:
ഞാനും പങ്കജും ബാല്യകാല സുഹൃത്തുക്കളായിരുന്നു. സൗഹൃദം പ്രണയമായി മാറി. പക്ഷേ ഞങ്ങൾ വ്യത്യസ്ത സാമൂഹിക വിഭാഗങ്ങളിൽ നിന്നുള്ളവരായതിനാൽ, ഞങ്ങളുടെ മാതാപിതാക്കൾ ഞങ്ങളുടെ ബന്ധത്തെ അംഗീകരിച്ചില്ല. പ്രണയമായിരുന്നു വലുതെന്ന് ചിന്തിക്കുന്ന പ്രായമായിരുന്നു ഞങ്ങൾക്ക്. അങ്ങനെ 21-ാം വയസ്സിൽ ഞങ്ങൾ ഒളിച്ചോടി വിവാഹം കഴിക്കാൻ തീരുമാനിച്ചു. ഭാഗ്യവശാൽ, അവന്റെ കുടുംബം ഞങ്ങളെ സ്വീകരിച്ചു. അങ്ങനെ ഞങ്ങൾ വിവാഹിതരായി.
ആദ്യമൊക്കെ കാര്യങ്ങൾ അടിപൊളി ആയി മുന്നോട്ട് പോയി. ഏറ്റവും സ്നേഹമുള്ള ഭർത്താവായിരുന്നു പങ്കജ്. ഒരു വർഷത്തിനുള്ളിൽ, ഞങ്ങൾക്ക് സുന്ദരിയായ ഒരു മകൾ പിറന്നു. കുറച്ച് വർഷങ്ങൾക്ക് ശേഷം രണ്ടാമത്തെ കുഞ്ഞും പിറന്നു. വർഷങ്ങൾ കടന്നുപോയി, പങ്കജ് വല്ലാതെ മാറി. കുടുംബത്തെ നോക്കാതെ ആയി, പൂർണമായും ഒരു മദ്യപാനി ആയി മാറി. മദ്യപിക്കുന്നതിനെ ചൊല്ലി ഞങ്ങൾ ഒരുപാട് വഴക്കിടാൻ തുടങ്ങി. ചോദിക്കുമ്പോഴൊക്കെ ‘അടുത്ത ദിവസം’ നിർത്തുമെന്ന് വെറുതെ പറയും. പക്ഷേ ആ ‘അടുത്ത ദിവസം’ ഒരിക്കലും വന്നില്ല.
വർഷങ്ങളോളം ഞങ്ങൾ ജീവിച്ചത് രണ്ട് പേരുടെയും മാതാപിതാക്കളുടെ പണം കൊണ്ടായിരുന്നു. എന്നാൽ, വളർന്നുവരുന്നത് രണ്ട് പെൺകുട്ടികൾ കൂടി ആയതിനാൽ നിലനിൽപ്പ് വളരെ കഷ്ടത്തിലായി. എന്നിട്ടും പങ്കജ് മദ്യപാനം അവസാനിപ്പിച്ചില്ല. സൂര്യൻ അസ്തമിക്കുന്ന സമയം മുതൽ പങ്കജ് മദ്യപാനം ആരംഭിക്കും. എന്റെ പെൺമക്കൾ വളർന്ന് വരേണ്ട ചുറ്റുപാട് ഇതല്ലെന്ന് ഞാൻ മനസിലാക്കി. 16 വർഷം നീണ്ട നുണകൾക്കൊടുവിൽ ഞാൻ പങ്കജിനെ തനിച്ചാക്കി വീടുവിട്ടിറങ്ങി. മക്കളെ കൂടെ കൂട്ടി. അത് കഠിനമായ തീരുമാനമായിരുന്നു. പ്രത്യേകിച്ചും പങ്കജ് ഞങ്ങളെ സ്നേഹിക്കുന്ന ഒരു അവസ്ഥയിൽ. എന്നാൽ, സ്നേഹം മാത്രം പോരല്ലോ ജീവിക്കാൻ. സ്നേഹം ഒരിക്കലും വിശക്കുന്ന വയറിന് പരിഹരാമാകില്ലല്ലോ. അങ്ങനെ എന്റെ പെണ്മക്കളുടെ ഭാവിയോർത്ത് ഞാൻ ആ വീട്ടിൽ നിന്നും ഇറങ്ങിനടന്നു.
Also Read:നിർത്താതെയുള്ള തുമ്മലിനെ തടയാൻ!
ഞങ്ങൾ ഏതാനും ആഴ്‌ചകൾ എന്റെ സഹോദരിയോടൊപ്പം ആയിരുന്നു താമസിച്ചിരുന്നത്. പിന്നീട് എനിക്ക് ജോലി ലഭിച്ചപ്പോൾ, ഒരു ചെറിയ അപ്പാർട്ട്‌മെന്റ് വാടകയ്‌ക്കെടുത്തു. ടാരറ്റ് കാർഡ് റീഡിംഗ്, ബിഹേവിയറൽ തെറാപ്പി എന്നിവയെ കുറിച്ച് പഠിപ്പിക്കുന്ന ചെറിയ ഒരു കോഴ്‌സിന് ചേർന്നു. ആ വർഷങ്ങൾ കഠിനമായിരുന്നു, പക്ഷേ ഒരു ടീമെന്ന നിലയിൽ ഞാനും എന്റെ പെൺമക്കളും ഒരുമിച്ച് അതിനെ അതിജീവിച്ചു. ഇളയ മകൾ ബിരുദ പഠനം പൂർത്തിയാക്കിയപ്പോൾ മൂത്ത മകൾ നൃത്തസംവിധായകയായി. എന്റെ വേർപിരിയലിനു ശേഷമുള്ള 11 വർഷങ്ങളിൽ, ഞങ്ങൾ 3 പേരും ഞങ്ങളുടെ സ്വപ്നങ്ങൾ സാക്ഷാത്കരിക്കാൻ കഠിനമായി പരിശ്രമിച്ചു.
അപ്പോഴാണ് പങ്കജ് മരിച്ചുവെന്ന വാർത്ത ഞാനറിയുന്നത്. കരൾ പ്രവർത്തനരഹിതമായിരുന്നു. അത് ഞങ്ങളെ വല്ലാതെ ഉലച്ചു. ഞങ്ങളുടെ അഭിപ്രായവ്യത്യാസങ്ങൾക്കിടയിലും, എന്റെ പെൺമക്കൾ അവരുടെ പിതാവുമായി സമ്പർക്കം പുലർത്തുന്നുവെന്ന് ഞാൻ ഉറപ്പാക്കിയിരുന്നു. പങ്കജിന്റെ മരണം എന്നെയും ബാധിച്ചു. എന്റെ മാനസികാരോഗ്യം തകർന്ന നിലയിലായിരുന്നു.
അപ്പോഴാണ് ഞാൻ മണ്ഡലി എന്ന പേരിൽ ഒരു മാനസികാരോഗ്യ സഹായ ഗ്രൂപ്പ് ആരംഭിച്ചത്. ഓരോ 15 ദിവസത്തിലും, ഞങ്ങൾ മുംബൈയിലുടനീളം ഭക്ഷണത്തെക്കുറിച്ച് ഒരു ചികിത്സാ സെഷൻ നടത്തി. പ്രതികരണം ഗംഭീരമായിരുന്നു. ഒരിക്കൽ, ഒരു സെഷനുശേഷം, ഒരു ആൺകുട്ടി 3 വർഷമായി താൻ സംസാരിച്ചിട്ടില്ലാത്ത പിതാവുമായി വീണ്ടും അടുത്തു. ഭക്ഷണത്തിന്റെയും ചികിത്സയുടെയും ശക്തി ഇതായിരുന്നു. കോവിഡ് സമയത്ത്, മുൻനിര പ്രവർത്തകർക്ക് ഞങ്ങൾ ഭക്ഷണം വിതരണം ചെയ്യാൻ തുടങ്ങി, ഞാൻ ട്രപ്-മാ കെ ഹാത് കാ ഖാനാ എന്ന പേരിൽ എന്റെ ക്ലൗഡ് കിച്ചൺ ആരംഭിച്ചു. ഞങ്ങൾ വീട്ടുജോലിക്കാരെ നിയമിക്കുകയും അവരുടെ ഭക്ഷണം നഗരത്തിലുടനീളം വിതരണം ചെയ്യുകയും ചെയ്തു.
ഇന്ന്, എന്റെ പെൺമക്കൾ സ്വയം ജോലി ചെയ്യുന്നു. ഒരാൾ കാനഡയിൽ പഠിക്കുന്നു, മറ്റൊരാൾ എന്റെ ബിസിനസ്സിൽ എന്നെ സഹായിക്കുന്നു. ജീവിതത്തിൽ ഒരു ദിവസം പോലും ജോലി ചെയ്യാത്ത ഒരു സ്ത്രീ എന്ന നിലയിൽ നിന്ന് ഇപ്പോൾ സ്വന്തം ബിസിനസ്സ് നടത്തുന്ന ഒരാളിലേക്ക് ഞാൻ മാറിയിരിക്കുന്നു. അതിനാൽ, ഞാൻ പറയാൻ ശ്രമിക്കുന്നത് നിങ്ങൾക്ക് എല്ലായ്പ്പോഴും ഒരു ചോയ്‌സ് ഉണ്ടെന്നും നിങ്ങൾക്കായി ഒരു മികച്ച ജീവിതം തിരഞ്ഞെടുക്കാൻ ഒരിക്കലും വൈകില്ലെന്നുമാണ്.
Post Your Comments