ആർ.എസ്.എസ് രാജ്യത്തിന് ഭീഷണി, പരാജയപ്പെടുത്താൻ ഇടതുപക്ഷം റെഡി: ഇത് കാലഘട്ടത്തിന്റെ ആവശ്യമെന്ന് ഡി രാജ

കണ്ണൂർ: കോൺ​ഗ്രസ് രാജ്യമെങ്ങും വേരോട്ടമുള്ള പാർട്ടിയെന്ന് ‍സി.പി.ഐ ജനറൽ സെക്രട്ടറി ഡി രാജ. ഇപ്പോഴത്തെ നിലപാടുകളിൽ‌ കോൺ​ഗ്രസ് സ്വയം തിരുത്തണമെന്നും, പല സംസ്ഥാനങ്ങളിലും കോൺ​ഗ്രസ് മതേതര മുന്നണിയുടെ ഭാ​ഗമാണെന്നും അദ്ദേഹം പറഞ്ഞു. കോൺഗ്രസിനെ പുകഴ്ത്തി പറഞ്ഞെങ്കിലും, ആർ.എസ്.എസിനെ തകർക്കാൻ കോൺഗ്രസിനാകില്ലെന്ന നിലപാടിലാണ് അദ്ദേഹം.

ആർ.എസ്.എസ് രാജ്യത്തിന് തന്നെ ഭീഷണിയാണെന്നും, ബി.ജെ.പി ഭരണത്തിൻ കീഴിൽ മതപരവും ജാതിപരവുമായ വേർതിരിവുകൾ തഴച്ചുവളരുകയാണെന്നും അദ്ദേഹം പറഞ്ഞു. സി.പി.ഐ എം 23-ാം പാർട്ടി കോൺ​ഗ്രസിനെ അഭിവാദ്യം ചെയ്‌ത് സംസാരിക്കവെയായിരുന്നു ആർ.എസ്.എസിനെ തകർക്കാൻ ഇടതുപക്ഷത്തിന് മാത്രമേ സാധിക്കൂ എന്നദ്ദേഹം പറഞ്ഞത്.

Also Read:ലോകോത്തര താരങ്ങൾ ഉണ്ടെന്ന് കരുതിയും പണമുണ്ടെന്ന് കരുതിയും എന്നും വിജയിക്കണമെന്നില്ല: സിൽവ

‘ആർ.എസ്.എസിനെ പ്രത്യയശാസ്‌ത്രപരമായി വെല്ലുവിളിക്കാനും പരാജയപ്പെടുത്താനും ഇടതുപക്ഷത്തിന് മാത്രമേ കഴിയൂ. ഇതിന് സമൂഹത്തിലെ എല്ലാ പുരോഗമന, മതേതര, ജനാധിപത്യ കക്ഷികളും ഒന്നാവണം. മറ്റ് മതനിരപേക്ഷ, ജനാധിപത്യ, പ്രാദേശിക പാർട്ടികളുമായി സഹകരിച്ച് ഇടതുപക്ഷം ആ പങ്ക് വഹിക്കാൻ സജ്ജമാവണം. അത് നമ്മുടെ ചരിത്രപരമായ ഉത്തരവാദിത്തമാണെന്ന് നാം മറക്കരുത്. ജാതി വ്യവസ്ഥയ്‌ക്കും പുരുഷാധിപത്യത്തിനും എതിരായ പോരാട്ടവും ഗൗരവമായി കാണണം. ആർ.എസ്.എസിനെ രാഷ്‌ട്രീയമായും പ്രത്യയശാസ്‌ത്രപരമായും പരാജയപ്പെടുത്താൻ ആവശ്യമായ ഐക്യം എങ്ങനെ കൈവരിക്കാമെന്ന ആത്മപരിശോധനയിൽ നാം ഏർപ്പെടണം’, അദ്ദേഹം പറഞ്ഞു.