ടാറ്റൂ ചെയ്യുന്ന സൂചിമുന നട്ടെല്ലിനോട് ചേർത്ത് നിർത്തി പീഡനം: സിസിടിവി ദൃശ്യങ്ങൾ ഞെട്ടിക്കുന്നത്, സുജീഷ് കുടുങ്ങുമ്പോൾ

കൊച്ചി: ടാറ്റൂ ചെയ്യാനെത്തിയപ്പോൾ പെൺകുട്ടികളെ ലൈംഗികമായി ചൂഷണം ചെയ്ത ടാറ്റൂ സ്റ്റുഡിയോ ഉടമയും കലാകാരനുമായ പിഎസ്. സുജീഷിനെ പോലീസ് അറസ്റ്റ് ചെയ്തത് തന്ത്രപരമായി. പെരുമ്പാവൂരിൽ സുഹൃത്തിൻ്റെ വീട്ടിൽ ഒളിവിൽ കഴിയുകയായിരുന്ന പ്രതിയെ ശനിയാഴ്ച്ച രാത്രിലാണ് പോലീസ് അറസ്റ്റ് ചെയ്തത്. സുജീഷിന്റെ ഫോൺ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ്, പ്രതി സുഹൃത്തിന്റെ വീട്ടിലുണ്ടെന്ന് ചേരാനെല്ലൂർ പൊലീസിന് വിവരം ലഭിച്ചത്. ഇവിടെയെത്തിയായിരുന്നു അറസ്റ്റ്. ഓടി രക്ഷപ്പെടാൻ പ്രതി ശ്രമം നടത്തിയെങ്കിലും സാധിച്ചില്ല.

ഇയാൾക്കെതിരായി ഏഴോളം യുവതികൾ പരാതിയുമായി രംഗത്തെത്തിയിരുന്നു. പ്രതി, ചേരാനല്ലൂർ പൊലീസ് സ്റ്റേഷനിൽ എത്തി കീഴടങ്ങുകയായിരുന്നു എന്നായിരുന്നു ആദ്യം പുറത്തുവന്ന വിവരം. എന്നാൽ, ഇത് പോലീസ് തന്നെ തള്ളുകയും സുഹൃത്തിന്റെ വീട്ടിൽ നിന്ന് പ്രതിയെ പിടികൂടുകയുമായിരുന്നുവെന്ന് വെളിപ്പെടുത്തുകയും ചെയ്തു.

Also Read:‘ആ അമ്മ വളരെ വിഷമത്തോടെ ഇരിക്കുന്നത് കണ്ടു, കൈയ്യിലൊരു പേപ്പർ: കാര്യം തിരക്കിയപ്പോൾ ശെരിക്കും ഞെട്ടിപ്പോയി’

ബലാത്സംഗമുൾപ്പെടെ 6 കേസുകളാണ് ഇയാൾക്കെതിരെ ചുമത്തിയിരിക്കുന്നത്. ഇടപ്പള്ളിയിലെ ‘ഇൻക്ഫെക്‌റ്റെഡ് ടാറ്റൂ സ്റ്റുഡിയോ’യിലാണ് കേസിന് ആസ്പദമായ സംഭവം നടന്നത്. ടാറ്റൂ ചെയ്യുന്ന സൂചിമുന നട്ടെല്ലിനോട് ചേർത്ത് നിർത്തി ഭീഷണിപ്പെടുത്തിയാണ് ഇയാൾ യുവതികളെ ലൈംഗികമായി ഉപയോഗിച്ചത് എന്നാണു വിവരം. സ്വകാര്യഭാഗത്തു ടാറ്റൂ വരയ്ക്കുന്നതിനിടെ സൂജീഷ് ലൈംഗികാതിക്രമം നടത്തിയതായി ഒരു യുവതി സമൂഹ മാധ്യമത്തിൽ വെളിപ്പെടുത്തൽ നടത്തിയിരുന്നു. ഇതിന് പിന്നാലെ ഒട്ടേറെപ്പേർ തങ്ങൾക്കുണ്ടായ ദുരനുഭവം പങ്കുവയ്ക്കുകയും പോലീസിൽ പരാതി നൽകുകയുമായിരുന്നു. ടാറ്റു ചെയ്യാൻ പ്രത്യേക മുറിയുണ്ടെന്നും, കൂടെ വരുന്നവരെ അവിടേക്കു കടത്തിവിടാറില്ലെന്നും പെൺകുട്ടികൾ വെളിപ്പെടുത്തി. 2017 മുതൽ തുടങ്ങിയ പീഡനങ്ങളെ കുറിച്ചാണ് യുവതികളുടെ മൊഴിയിലുള്ളത്. സ്വകാര്യഭാഗത്ത് അനുവാദമില്ലാതെ സ്പർശിക്കുകയും, ടാറ്റൂ വരക്കാനെന്ന പേരിൽ വിവസ്ത്രരാക്കി ലൈംഗിക ചൂഷണത്തിന് ഇരയാക്കിയെന്നും പെൺകുട്ടികളുടെ മൊഴിയിലുണ്ട്.

പോലീസ് ടാറ്റൂ സ്റ്റുഡിയോയിൽ ഇന്നലെ റെയ്ഡ് നടത്തിയിരുന്നു. സ്ഥാപനത്തിലെ കമ്പ്യൂട്ടർ, ഹാർഡ് ഡിസ്ക്, സിസിടിവി, ഡിവിആർ, എന്നിവ പിടിച്ചെടുത്തിരുന്നു. ഇവയിലെല്ലാം ഞെട്ടിക്കുന്ന ദൃശ്യങ്ങളാണ് ഉള്ളതെന്നാണ് സൂചന. ഇങ്ക്ഫെക്ടഡ് എന്ന ടാറ്റൂ സെന്‍റർ കൊച്ചിയിലെ ചലച്ചിത്ര താരങ്ങളടക്കമുള്ളവരുടെ പ്രധാന കേന്ദ്രമാണ്. ടാറ്റൂ കേന്ദ്രങ്ങൾ തമ്മിലുള്ള മത്സരമാണ് പരാതിക്ക് പിന്നില്ലെന്ന് പ്രചരിപ്പിക്കാൻ സുജീഷ് ശ്രമിച്ചെങ്കിലും അത് ഫലം കണ്ടില്ല.