കണ്ണൂര്‍: തലശ്ശേരി പുന്നോലില്‍ സിപിഎം പ്രവര്‍ത്തകന്‍ കൊരമ്പില്‍ ഹരിദാസിനെ കൊലപ്പെടുത്തിയത് ആര്‍എസ്എസ് പരിശീലന പരിപാടിയില്‍ പങ്കെടുത്തവരാണെന്ന കോടിയേരി ബാലകൃഷ്ണന്റെ പ്രസ്താവനയ്ക്ക് മറുപടിയുമായി ബിജെപി നേതാവ് സന്ദീപ് വാര്യര്‍ രംഗത്തെത്തി. ആര്‍എസ്എസ് ക്യാമ്പുകള്‍ രഹസ്യമായല്ല, പരസ്യമായാണ് സംഘടിപ്പിക്കുന്നതെന്ന് സന്ദീപ് വാര്യര്‍ പറഞ്ഞു.
Read Also : കൊലപാതകം കൊണ്ട് സിപിഎമ്മിനെ തകർക്കാനാവില്ലെന്ന് കോടിയേരി ബാലകൃഷ്ണൻ
‘ആര്‍എസ്എസുകാര്‍ പരസ്യമായി വിദ്യാഭ്യാസ സ്ഥാപനങ്ങള്‍ വാടകയ്ക്ക് എടുത്താണ് ക്യാമ്പുകള്‍ സംഘടിപ്പിക്കുന്നത്. രാജ്യത്ത് എല്ലായിടത്തും ആര്‍എസ്എസ് ഇത്തരം ക്യാമ്പുകള്‍ സംഘടിപ്പിക്കുന്നുണ്ട്. ഈ പരിശീലനം കഴിഞ്ഞ ആളുകള്‍ തന്നെയാണ് രാഷ്ട്രപതി ഭവന്‍ മുതല്‍ താഴെ തട്ടില്‍വരെയുള്ളത്’ ,സന്ദീപ് വാര്യര്‍ പറഞ്ഞു.
‘ഫസല്‍ വധം നടന്നപ്പോള്‍ പൊലീസ് അന്വേഷണത്തിനു മുന്‍പ് പ്രതികളെ പ്രഖ്യാപിച്ചയാളാണ് കോടിയേരി. അവസാനം അന്വേഷണം കോടിയേരിയുടെ വീട്ടിലെത്തുകയും ചെയ്തുവെന്ന് സന്ദീപ് വാര്യര്‍ ചൂണ്ടിക്കാട്ടി.
‘ഹരിദാസിനെ കൊലപ്പെടുത്തിയത് ആര്‍എസ്എസ് അല്ല, കൊലപാതകത്തിന് പിന്നില്‍ ഗൂഢാലോചന നടന്നിട്ടുണ്ടെങ്കില്‍ പൊലീസ് അന്വേഷിക്കട്ടെ. ഇത്തരത്തില്‍ രാഷ്ട്രീയ കൊലപാതകം നടക്കുമ്പോള്‍ പ്രതികളെ മുന്‍കൂട്ടി പ്രഖ്യാപിക്കുകയും യഥാര്‍ത്ഥ പ്രതികളെ രക്ഷപ്പെടാന്‍ അനുവദിക്കുകയും ചെയ്യുന്നത് ശരിയല്ല. ആര് തെറ്റുചെയ്താലും യഥാര്‍ത്ഥ പ്രതികളിലേക്ക് അന്വേഷണം എത്തട്ടെ’ , സന്ദീപ് വാര്യര്‍ പ്രതികരിച്ചു.
Post Your Comments