കെട്ടിടത്തിൽ നിന്ന്​ വീണ് ഗുരുതര പരിക്കേറ്റയാൾ വിദഗ്​ധ ചികിത്സ കിട്ടാതെ മരിച്ചു

തൃപ്പൂണിത്തുറ: ഭിത്തി ഇടിഞ്ഞ് കെട്ടിടത്തിൽ നിന്ന്​ വീണ്​ ഗുരുതര പരിക്കേറ്റയാൾ വിദഗ്​ധ ചികിത്സ കിട്ടാതെ മരിച്ചു. എരൂർ വെസ്റ്റ് പെരീക്കാട് കൃഷ്ണന്‍റെ മകൻ ശിശുപാലനാണ്​ (52) മരിച്ചത്.

വ്യാഴാഴ്ച ഉച്ചയ്ക്ക് ഒന്നരയോടെയാണ് സംഭവം. തൃപ്പൂണിത്തുറ ലായം റോഡിലെ ഫുഡ്‌ സേഫ്റ്റി ഓഫിസ് കെട്ടിടത്തിന് മുകളിൽ അറ്റകുറ്റപ്പണി നടത്തവേ ഭിത്തി ഇടിഞ്ഞാണ് ശിശുപാലൻ താഴെ വീണത്.

Read Also : കഴിഞ്ഞ തവണത്തെ പോലെയല്ല ഇത്തവണ സീറോ ബഡ്ജറ്റിൽ ആറ്റുകാൽ പൊങ്കാല ശുചീകരണം: ചരിത്രമെഴുതി തിരുവനന്തപുരം നഗരസഭ

കെട്ടിട അവശിഷ്ടങ്ങൾക്കിടയിൽ വീണുകിടന്ന ശിശുപാലനെ ഉടൻ തൃപ്പൂണിത്തുറ താലൂക്ക്​ ആശുപത്രിയിൽ എത്തിച്ചെങ്കിലും സ്കാൻ സൗകര്യമില്ലാതിരുന്നതിനാൽ എറണാകുളം ജനറൽ ആശുപത്രിയിലേക്ക്​ മാറ്റി. അവിടെയും സി.ടി സ്കാൻ ഇല്ലാത്തതിനാൽ കളമശ്ശേരിയിലെ എറണാകുളം ഗവ. മെഡിക്കൽ കോളജ്​ ആശുപത്രിയിലേക്ക്​ കൊണ്ടുപോകവേ നില വഷളായതിനെത്തുടർന്ന് പാലാരിവട്ടത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരിക്കുകയായിരുന്നു.

സ്കാൻ സൗകര്യം സമയത്തിന് ലഭിക്കാതെ വിദഗ്​ധ ചികിത്സ വൈകിയതാണ്​ ശിശുപാലന്‍റെ മരണത്തിന് കാരണമെന്ന്​ ബന്ധുക്കൾ ആരോപിച്ചു. തൃപ്പൂണിത്തുറ താലൂക്ക് ആശുപത്രി മോർച്ചറിയിൽ സൂക്ഷിച്ച മൃതദേഹം പോസ്റ്റ്മോർട്ടത്തിനുശേഷം വെള്ളിയാഴ്ച ഉച്ചയോടെ നഗരസഭ ശ്മശാനത്തിൽ സംസ്കരിക്കും. ഭാര്യ: മായ. മക്കൾ: അക്ഷയ്, അനുപമ.