‘ജീവിതം വഴിമുട്ടിയ സ്റ്റേജ് കലാകാരന്മാർക്ക് കൈത്താങ്ങ്’: 2 ലക്ഷം രൂപ നൽകിയ സുരേഷ് ഗോപിക്ക് നന്ദി പറഞ്ഞ് താരങ്ങൾ

ജീവിതം വഴിമുട്ടിയ സ്റ്റേജ് കലാകാരന്മാർക്ക് കൈത്താങ്ങ് ആയി തന്റെ പ്രതിഫലത്തുകയിൽ നിന്നും രണ്ട് ലക്ഷം രൂപ നൽകിയ നടൻ സുരേഷ് ഗോപിക്ക് നന്ദി അറിയിച്ച് സംവിധായകന്മാരായ നാദിർഷയും രമേശ് പിഷാരടിയും. ഉത്സവങ്ങളും ആഘോഷങ്ങളും ഇല്ലാതായി ജീവിതം വഴിമുട്ടിയ സ്റ്റേജ് കലാകാരന്മാർക്ക് കൈത്താങ്ങായ സുരേഷ് ഗോപിക്ക് അവരുടെ പേരിൽ നന്ദി അറിയിക്കുന്നുവെന്ന് നാദിർഷായും പിഷാരടിയും ഫേസ്‌ബുക്കിൽ കുറിച്ചു. പുതിയ ചിത്രത്തിന്റെ അഡ്വാൻസ് ലഭിച്ചപ്പോൾ അതിൽ നിന്നും 2 ലക്ഷം രൂപ സംഘടനയ്ക്ക് കൈമാറിയാണ് അദ്ദേഹം തന്റെ വാക്ക് പാലിച്ചത്. സംവിധായകൻ നാദിർഷയാണ് ഇക്കാര്യം വെളിപ്പെടുത്തിയത്. ഉത്സവങ്ങളും ആഘോഷങ്ങളും ഇല്ലാതായി ജീവിതം വഴിമുട്ടിയ സ്റ്റേജ് കലാകാരന്മാർക്ക് അദ്ദേഹത്തിന്റെ സഹായം ഏറെ ഗുണകരമാകുമെന്ന കാര്യത്തിൽ സംശയമില്ല.

രമേശ് പിഷാരടിയുടെ ഫേസ്‌ബുക്ക് പോസ്റ്റ്:

ഓർമയുണ്ടാവും..ഈ മുഖം. നർമം തൊഴിലാക്കിയ 200 ഓളം കുടുംബങ്ങൾക്ക്. ‘ഇനി മുതൽ ഞാൻ ചെയ്യുന്ന ഓരോ സിനിമയുടെ പ്രതിഫലത്തിൽ നിന്നും 2 ലക്ഷം രൂപ നിങ്ങളുടെ സംഘടനയ്ക്ക് തരും’, സുരേഷ് ഗോപി. ടെലിവിഷൻ ഷോകൾ സംഘടിപ്പിക്കുകയും അതിൽ നിന്നും സമാഹരിക്കുന്ന പണം ,മിമിക്രി കലാകാരന്മാരുടെ വിധവകൾക്കും,കുട്ടികളുടെ വിദ്യാഭ്യാസത്തിനും,ആശുപത്രി ചിലവുകൾക്കും എല്ലാം ഉപയോഗിക്കകയും മിമിക്രി കലാകാരന്മാരുടെ ഉന്നമനത്തിനു വേണ്ടി നിലകൊള്ളുകയും ,സാമൂഹികമായി ഒരു പാട് ഉത്തരവാദിത്വങ്ങൾ നിറവേറ്റുകയും ചെയ്യുന്ന സംഘടന ആണ് ‘MAA'( Mimicry Artist association) ഈ കഴിഞ്ഞ ഓണക്കാലത്ത് ഏഷ്യാനെറ്റിൽ അവതരിപ്പിച്ച ഷോയിൽ പ്രതിഫലം ഒന്നും തന്നെ വാങ്ങാതെ എത്തി;സാധാരണക്കാരായ കലാകാരന്മാരോടൊപ്പം ആടിയും പാടിയും ഹാസ്യം പറഞ്ഞും ,അനുകരിച്ചും സമയം ചെലവിട്ട സുരേഷേട്ടൻ പ്രഖ്യാപിച്ച വാക്കുകളാണ് ആദ്യം പറഞ്ഞത്. പുതിയ ചിത്രത്തിന്റർ അഡ്വാൻസ് ലഭിച്ചപ്പോൾ തന്നെ അതിൽ നിന്നും പറഞ്ഞ വാക്ക് പാലിച്ചു കൊണ്ട് 2 ലക്ഷം രൂപ സംഘടനയ്ക്ക് ഇന്നലെ നൽകുകയുണ്ടായി. ഉത്സവങ്ങളും ആഘോഷങ്ങളും ഇല്ലാതായി ജീവിതം വഴിമുട്ടിയ സ്റ്റേജ് കലാകാരന്മാരുടെ പേരിലുള്ള നന്ദി. അച്ചാമ്മ വർഗീസിനെ ആവശ്യ സമയത്തു അകമഴിഞ്ഞ് സഹായിച്ച ഭരതചന്ദ്രൻ പിന്നീട് അവരോട് തന്നെ ചോദിച്ച ചോദ്യമാണ് ‘ഓർമയുണ്ടോ ഈ മുഖം’ MAA എന്ന സംഘടന പറയട്ടെ. എന്നും ഓർമയുണ്ടാകും ഈ മുഖം.