ബ്ലേഡ് മാഫിയയുടെ ഭീഷണിയെ തുടർന്ന് ​ഗൃ​ഹനാഥന്റെ ആത്മഹത്യ : പണം പലിശക്ക് കൊടുത്തവരുടെ വീടുകളിൽ റെയ്ഡ്

ഗുരുവായൂർ: കോട്ടപ്പടി പരിയാരത്ത് ​ഗൃഹനാഥൻ രമേഷിന്റെ ആത്മഹത്യയുമായി ബന്ധപ്പെട്ട് പണം പലിശക്ക് കൊടുത്തവരുടെ വീടുകളിൽ പൊലീസ് റെയ്ഡ്.

5000 രൂപ വായ്പയെടുത്തതിന്റെ പേരില്‍ ബ്ലേഡ് മാഫിയയില്‍ നിന്നുണ്ടായ ഭീഷണി മൂലമാണ്​ രമേഷ് ആത്മഹത്യ ചെയ്തതെന്ന് കാണിച്ച് ഭാര്യ കവിത പൊലീസിൽ പരാതി നൽകിയിരുന്നു. ഈ മാസം 12നാണ് രമേഷ് (52) ആത്മഹത്യ ചെയ്തത്.

Read Also : നാടന്‍ബോംബ് കണ്ടെത്തിയ സംഭവത്തിൽ ഗു​ണ്ട​സം​ഘ​ത്ത​ല​വ​നടക്കം രണ്ടുപേർ അറസ്റ്റിൽ

അതേസമയം തന്റെ വ്യാജ മൊഴി പൊലീസ് രേഖപ്പെടുത്തിയെന്ന് കാണിച്ച് കവിതയുടെ സഹോദരൻ കനകേഷും ഉന്നത പൊലീസ് ഉദ്യോഗസ്ഥർക്ക്​ പരാതി നൽകി. എ.സി.പി കെ.ജി. സുരേഷ് രമേഷിന്റെ വീട്ടിലെത്തി ഭാര്യ കവിത, ബന്ധുക്കൾ എന്നിവരിൽ നിന്ന് മൊഴി രേഖപ്പെടുത്തി.

ഒരു സ്ത്രീ ഉൾപ്പെടെ രണ്ട് പേർക്കെതിരെയാണ് മണി ലെൻഡിങ് നിയമപ്രകാരം കേസ് എടുത്തിരിക്കുന്നത്. ഇവരുടെ വീടുകളിലാണ് പൊലീസ് റെയ്ഡ് നടത്തിയത്.