ഐഎഎസുക്കാരനാകാൻ ജ്യോത്സ്യന്റെ നിർദേശ പ്രകാരം തങ്കഭസ്മം കുടിച്ച വിദ്യാർത്ഥിക്ക് സംഭവിച്ചത്

കണ്ണൂർ: ഭാവിയിൽ ഐഎഎസ് പരീക്ഷ പാസാകാൻ വേണ്ടി ജ്യോത്സ്യൻ ആണെന്ന് അവകാശപ്പെട്ട ആളുടെ നിർദേശം അനുസരിച്ച് തങ്കഭസ്മം പാലിൽ കലക്കി കുടിച്ച വിദ്യാർഥിയുടെ കാഴ്ച ശക്തിക്ക് തകരാർ സംഭവിച്ചതായി പരാതി. കണ്ണവത്താണ് സംഭവം. കണ്ണാടിപ്പറമ്പ് സ്വദേശിയായ ജ്യോത്സ്യനെതിരെയാണ് പരാതി.

വീട് നിർമാണവുമായി ബന്ധപ്പെട്ട് കുറ്റി അടിക്കാൻ മുഹൂർത്തം നോക്കാനാണ് കണ്ണൂർ കൊറ്റാളി സ്വദേശി പാരഡിസ് ഹൗസിൽ മൊബിൻ ചാന്ദ് ആദ്യമായി കണ്ണാടിപ്പറമ്പിലെ ഇയാളുടെ ജ്യോതിഷാലയത്തിൽ എത്തുന്നത്. തുടർന്നു വാഹനാപകടത്തിൽ മൊബിൻ മരണപ്പെടാൻ സാധ്യതയുണ്ടെന്ന് പറഞ്ഞ് ഭാര്യയെയും ബന്ധുക്കളെയും മറ്റും ഭയപ്പെടുത്തി വിശ്വസിപ്പിച്ചു. ഇതോടെ ആദിവാസികളിൽ നിന്നു ലഭിക്കുന്ന ഗരുഡന്റെ തലയിലുള്ള ഗരുഡ രത്നം പത്ത് എണ്ണം വാങ്ങി വീട്ടിൽ സൂക്ഷിക്കാൻ നിർദേശിച്ചു.

തുടർന്ന് വ്യാജ ഗരുഡ രത്നം, തങ്ക ഭസ്മം, വിദേശ ലക്ഷ്മി യന്ത്രം എന്നിവ നൽകി 11,75,000 രൂപ വാങ്ങി. ഭാവിയിൽ മകൻ ഐഎഎസ് പാസ് ആവണമെങ്കിൽ തങ്ക ഭസ്മം പാലിൽ കലക്കി കുടിക്കണം എന്നും വീട്ടിൽ വിദേശ ലക്ഷ്മി യന്ത്രം സൂക്ഷിക്കണമെന്നും നിർദേശിച്ചു. ഇതിൽ സംശയം തോന്നിയതോടെയാണ് മൊബിൻ ചാന്ദ് കണ്ണവം പൊലീസിൽ പരാതി നൽകിയത്.