തിരുവനന്തപുരം: എംഎസ്എഫ് വനിതാ വിഭാഗമായ ഹരിതയുടെ പുതിയ സംസ്ഥാന കമ്മിറ്റി പ്രഖ്യാപിച്ചു. പുതിയ സംസ്ഥാന പ്രസിഡന്റായി പിഎച്ച് ആയിശ ബാനുവിനേയും ജനറല്‍ സെക്രട്ടറിയായി റുമൈസ റഫീഖിനേയും തിരഞ്ഞെടുത്തു. പിരിച്ചുവിട്ട സംസ്ഥാന കമ്മിറ്റിയിലെ ട്രഷററായിരുന്നു ആയിശ ബാനു. പുതിയ കമ്മറ്റിയിൽ ട്രഷററായി നയന സുരേഷ് (മലപ്പുറം), സെക്രട്ടറിമാരായി അഫ്ഷില (കോഴിക്കോട്) ഫായിസ. എസ് (തിരുവനന്തപുരം) അഖീല ഫർസാന (എറണാകുളം) എന്നിവരെയും തീരുമാനിച്ചു.
അതേസമയം ഹരിത വിവാദത്തില്‍ എംഎസ്എഫ് സംസ്ഥാന പ്രസിഡന്റ് പികെ നവാസിന് പിന്തുണയുമായി മുസ്‌ലിം ലീഗ് സംസ്ഥാന ജനറല്‍ സെക്രട്ടറി പിഎംഎ സലാം രംഗത്തെത്തി. ഹരിത വിവാദത്തിന് പിന്നില്‍ ഗൂഢാലോചനയുണ്ടായിരുന്നുവെന്നും ഹരിത ഭാരവാഹികള്‍ക്ക് നിഗൂഢമായ ഉദ്ദേശ്യങ്ങള്‍ ഉണ്ടായിരുന്നുവെന്നും അദ്ദേഹം പറഞ്ഞു. പാണക്കാട് കുടുംബത്തിന്റെ തീരുമാനം ലംഘിക്കുന്നത് അംഗീകരിക്കാനാകില്ലെന്നും പിഎംഎ സലാം കൂട്ടിച്ചേർത്തു.
Post Your Comments