ഉത്തർപ്രദേശ് വാഹനാപകടം: മരണപ്പെട്ടവരുടെ കുടുംബങ്ങൾക്ക് ധനസഹായം നൽകുമെന്ന് യോഗി ആദിത്യനാഥ്

ലക്‌നൗ : ഉത്തർപ്രദേശിലെ ബാരാബങ്കിയിൽ നടന്ന വാഹനാപകടത്തിൽ മരണപ്പെട്ടവരുടെ കുടുംബങ്ങളേയും പരിക്കേറ്റവരേയും ആശ്വസിപ്പിച്ച് മുഖ്യമന്ത്രി യോഗി ആദിത്യനാഥ്. ‘ബാരാബങ്കിയിൽ നിരവധിപേർ വാഹനാപകടത്തിൽ കൊല്ലപ്പെട്ടതിൽ ഏറെ വേദനിക്കുന്നു. തികച്ചും യാദൃശ്ചികമായ സംഭവത്തിൽ മരണപ്പെട്ടവരുടെ കുടുംബത്തിന്റെ തീരാദുഃഖത്തിൽ താനും പങ്കുചേരുകയാണ്. ഉറ്റവരുടെ വിയോഗം താങ്ങാനുള്ള മന:ശക്തി ഈശ്വരൻ എല്ലാവർക്കും നൽകട്ടെ’- അനുശോചന സന്ദേശത്തിൽ യോഗി ആദിത്യനാഥ് പറഞ്ഞു.

മരണപ്പെട്ടവരുടെ കുടുംബങ്ങൾക്ക് മതിയായ ധനസഹായം നൽകുമെന്നും പരിക്കേറ്റവരുടെ ചികിത്സ ഭരണകൂടം ഏറ്റെടുത്ത് നടത്തുമെന്നും യോഗി ആദിത്യനാഥ് അറിയിച്ചു. സംസ്ഥാനത്തെ പ്രധാനപ്പെട്ട ഉദ്യോഗസ്ഥർ ഇന്നു തന്നെ സംഭവസ്ഥലം സന്ദർശിക്കുമെന്നും യോഗി ആദിത്യനാഥ് അറിയിച്ചു.

Read Also  :  ഭക്തിഗാനങ്ങളുടെ പകർപ്പവകാശം തട്ടിയെടുത്തു: നടൻ ജയറാമിനെതിരെ പരാതിയുമായി യുവാവിന്റെ കുടുംബം

ഇന്നലെ അർദ്ധരാത്രിയിലാണ് ലക്‌നൗ-ഹരിയാന ദേശീയപാതയിൽ അപകടം നടന്നത്. അമിതവേഗത്തെ തുടർന്ന്​ നിയന്ത്രണം വിട്ട ട്രക്ക് നിർത്തിയിട്ടരുന്ന ബസിന് മുന്നിൽ ഇടിക്കുകയായിരുന്നു. ബസിനു മുന്നിൽ ഉറങ്ങി കിടന്നിരുന്നവർക്ക് മുകളിലൂടെ ട്രക്കും ബസും കയറിയിറങ്ങിയാണ് അപകടമുണ്ടായത്. അപകടത്തിൽ 18 പേർ മരിച്ചു. ബീഹാർ സ്വദേശികളാണ് മരിച്ചത്. 19 പേർക്ക് സംഭവത്തിൽ പരിക്കേറ്റിട്ടുണ്ട്.