തിരുവനന്തപുരം: തിരുവനന്തപുരം നഗരസഭയുടെ കൗണ്‍സില്‍ യോഗത്തില്‍ മേയർ ആര്യാ രാജേന്ദ്രൻ പൊട്ടിത്തെറിച്ചത് വാർത്തയായിരുന്നു. എല്‍ കെ ജി കുട്ടിയെന്ന ബി ജെ പി കൗണ്‍സിലര്‍മാരുടെ പരിഹാസത്തിനു പ്രായം എത്രയായാലും ഉത്തരവാദിത്തം നിറവേറ്റാന്‍ അറിയാമെന്നായിരുന്നു ആര്യ യോഗത്തില്‍ പറഞ്ഞത്. വിഷയത്തിൽ ആര്യയെ പുകഴ്ത്തി സന്ദീപ് ദാസ് എന്ന യുവാവിന്റെ കുറിപ്പ്. അനവധി സാധാരണക്കാർക്കിടയിൽ പ്രവർത്തിച്ചിട്ടാണ് ആര്യ ഇവിടം വരെയെത്തിയതെന്ന് യുവാവ് ഫേസ്‌ബുക്കിൽ പങ്കുവെച്ച പോസ്റ്റിൽ വ്യക്തമാക്കുന്നു.
മീൻ പിടിക്കുന്നവരുടെയും ചുമടെടുക്കുന്നവരുടെയും പ്രതിനിധിയാണ് ആര്യയെന്ന് കുറിച്ച സന്ദീപ്, മേയറുടെ മനക്കരുത്തിനെയും പ്രശംസിക്കുന്നുണ്ട്. ഒരു വാടകവീട്ടിൽനിന്നും മേയർ പദവി വരെ ഉയർന്ന ആര്യയ്ക്ക് ആ ചുറ്റുപാടിൻ്റെ വീര്യവും കരുത്തും വേണ്ടുവോളമുണ്ടെന്ന് സന്ദീപ് കുറിച്ചു. ആര്യയെ ചൊറിയാൻ പോകുമ്പോൾ സൂക്ഷിക്കണമെന്ന മുന്നറിയിപ്പും സന്ദീപ് ദാസ് നൽകുന്നുണ്ട്. സന്ദീപിന്റെ ഫേസ്‌ബുക്ക് പോസ്റ്റ് ഇങ്ങനെ:
”പെണ്ണിന് എന്താ കുഴപ്പം?” എന്ന് നിയമസഭയിൽ ചോദിച്ചത് കെ.കെ ശൈലജ ടീച്ചറാണ്. പുരുഷാധിപത്യം ഒരു അലങ്കാരമായി കൊണ്ടുനടക്കുന്നവരുടെ നെഞ്ചിൽ തറച്ച കൂരമ്പ് തന്നെയായിരുന്നു ആ വാക്കുകൾ. മേയർ ആര്യാ രാജേന്ദ്രനും അതേ പാതയിലൂടെയാണ് സഞ്ചരിക്കുന്നത്. ”എ.കെ.ജി സെൻ്ററിലെ എൽ.കെ.ജി കുട്ടിയെ മേയറാക്കിയാൽ ഇങ്ങനെയിരിക്കും” എന്ന് പരിഹസിച്ചവർക്ക് ആര്യ നൽകിയ ഉശിരൻ മറുപടി സമൂഹമാദ്ധ്യമങ്ങളിൽ വൈറലായിക്കഴിഞ്ഞു. ”ഈ പ്രായത്തിൽ മേയറായിട്ടുണ്ടെങ്കിൽ അതനുസരിച്ച് പ്രവർത്തിക്കാനുമറിയാം. അത്തരമൊരു സംവിധാനത്തിലൂടെയാണ് ഞാൻ വളർന്നുവന്നത് എന്ന് അഭിമാനത്തോടെ പറയാൻ എനിക്ക് സാധിക്കും…!”. ഈ വരികൾ ഒരുപാട് കാലം ആഘോഷിക്കപ്പെടും.
സൈബർ ലോകത്ത് ഏറ്റവും കൂടുതൽ അധിക്ഷേപങ്ങളും തെറിവിളികളും നേരിട്ടുകൊണ്ടിരിക്കുന്ന വ്യക്തിയാണ് ആര്യ. അതിന് പല കാരണങ്ങളുമുണ്ട്. സ്ത്രീകൾ അധികാരസ്ഥാനങ്ങളിലെത്തുമ്പോൾ പാരമ്പര്യവാദികൾ അസ്വസ്ഥരാകാറുണ്ട്. പെണ്ണിൻ്റെ സ്വരം ഉയരുമ്പോൾ മെയ്ൽ ഷോവനിസ്റ്റുകൾക്ക് വിറളി പിടിക്കാറുണ്ട്. തിരുവനന്തപുരം നഗരസഭാ കൗൺസിൽ യോഗത്തിൽ ആര്യ സംസാരിക്കുന്ന സമയത്ത് പലരും തടസ്സപ്പെടുത്താൻ ശ്രമിച്ചിരുന്നു എന്ന കാര്യം ശ്രദ്ധിക്കണം. പക്ഷേ ആരെയും കൂസാതെ ആര്യ പറഞ്ഞുതീർത്തു. ശരിക്കും തീ പാറിയ മറുപടി! ഇടതുപക്ഷത്ത് നിലകൊള്ളുന്നത് കൊണ്ടാണ് ശൈലജ ടീച്ചറും മേഴ്സിക്കുട്ടിയമ്മയും അധിക്ഷേപിക്കപ്പെടുന്നത്. പിണറായി വിജയൻ്റെ മകളാണ് എന്ന ഒറ്റക്കാരണത്തിൻ്റെ പേരിലാണ് വീണ വിജയനെ മാദ്ധ്യമങ്ങൾ വേട്ടയാടുന്നത്. അത്തരമൊരു നാട്ടിൽ ആര്യയ്ക്ക് മാന്യമായ സമീപനം പ്രതീക്ഷിക്കാനാവുമോ?
രാജ്യത്തിലെ ഏറ്റവും പ്രായം കുറഞ്ഞ മേയർ എന്ന ഖ്യാതിയോടെയാണ് ആര്യ പ്രവർത്തിക്കുന്നത്. ഈ വിപ്ലവത്തോടുള്ള അസൂയ പല രീതികളിൽ പുറത്തുവരാതിരിക്കുമോ? ആര്യ മേയറായി തെരഞ്ഞെടുക്കപ്പെട്ട ഘട്ടത്തിൽ വളരെയേറെ ഹൃദയസ്പർശിയായ ഒരു വിഡിയോ കണ്ടിരുന്നു. ഓമന എന്ന മത്സ്യത്തൊഴിലാളി ആര്യയെ അഭിനന്ദിക്കുന്നതിനുവേണ്ടി ഓടിയെത്തി. ആര്യ അവരെ ചേർത്തുപിടിച്ച് നിൽക്കുമ്പോൾ മാദ്ധ്യമപ്രവർത്തകർ ചോദിച്ചു- ”ആര്യ മേയറായതിൽ സന്തോഷമുണ്ടോ? ” നിറകണ്ണുകളോടെ ഓമന മറുപടി പറഞ്ഞു-”ഒരുപാട് സന്തോഷം. ഇനിയെൻ്റെ കുഞ്ഞിൻ്റെ കൈയ്യിൽ നിന്ന് ഒരു ചായ വാങ്ങിക്കുടിക്കണം…”ഓമനയെപ്പോലുള്ള അനവധി നിരവധി സാധാരണക്കാർക്കിടയിൽ പ്രവർത്തിച്ചിട്ടാണ് ആര്യ ഇവിടം വരെയെത്തിയത്.
മീൻ പിടിക്കുന്നവരുടെയും ചുമടെടുക്കുന്നവരുടെയും പ്രതിനിധിയാണ് ആര്യ. ഒരു വാടകവീട്ടിൽനിന്നാണ് മേയർ പദവി വരെ ഉയർന്നത്. ആ ചുറ്റുപാടിൻ്റെ വീര്യവും കരുത്തും അവരിൽ വേണ്ടുവോളമുണ്ട്. ആര്യയെ ചൊറിയാൻ പോകുമ്പോൾ സൂക്ഷിക്കണം മിത്രങ്ങളേ. പ്രായവും ജെൻ്ററും നോക്കി കളിയാക്കാൻ ഇറങ്ങിപ്പുറപ്പെട്ടാൽ ഖേദിക്കേണ്ടിവരും. നഗരസഭാ കൗൺസിലിൻ്റെ ഹാളിൽ നിന്ന് നിങ്ങളെ വടിച്ചെടുക്കേണ്ടിവരും. പൊടിപോലുമുണ്ടാവില്ല കണ്ടുപിടിക്കാൻ…!
Post Your Comments