ആരാധകരുടെ പ്രാർത്ഥന ഫലിച്ചു, നേട്ടം കൈവരിച്ചത് യുവന്റസും റൊണാൾഡോയും

മൂന്ന് ലീഗുകളിലും ടോപ് സ്‌കോറർ ആകുന്ന ആദ്യ താരമായി ക്രിസ്റ്റ്യാനോ റൊണാൾഡോ. സീരി എ സീസണിൽ 29 ഗോളുകൾ നേടിയാണ് റൊണാൾഡോ ഈ നേട്ടം കൈവരിച്ചത്. ഇതിനു മുമ്പ് രണ്ട് സീസണിൽ യുവന്റസിൽ കളിച്ചപ്പോഴും ഈ പുരസ്കാരം നേടാൻ റൊണാൾഡോയ്ക്ക് കഴിഞ്ഞിരുന്നില്ല. അതേസമയം, സീരി എ സീസൺ അവസാനിച്ചപ്പോൾ യുവന്റസ് ചാമ്പ്യൻസ് ലീഗ് യോഗ്യത നിലനിർത്തി.

ലീഗിൽ 23 ഗോളുകൾ നേടിയ ലുകാകുവാണ് ടോപ് സ്‌കോറർമാരിൽ രണ്ടാമത്. 2007-08 സീസണിൽ ഡെൽ പിയേറൊക്ക് ശേഷം ആദ്യമായാണ് ഒരു യുവന്റസ് താരം സീരി എയിൽ ടോപ് സ്‌കോറർ ആകുന്നത്. ഈ നേട്ടത്തോടെ യൂറോപ്പിലെ ഏറ്റവും മികച്ച അഞ്ചു ലീഗുകളിൽ മൂന്ന് ലീഗിലും ടോപ് സ്‌കോറർ പട്ടം നേടുന്ന ആദ്യ താരമായി റൊണാൾഡോ മാറുകയും ചെയ്തു. നേരത്തെ സ്പാനിഷ് ലീഗിലും ഇംഗ്ലീഷ് പ്രീമിയർ ലീഗിലുമാണ് താരം ടോപ് സ്‌കോറർ നേട്ടം സ്വന്തമാക്കിയത്.