ലാ ലിഗയിൽ കിരീട പ്രതീക്ഷ നിലനിർത്തി റയൽ മാഡ്രിഡ്

സ്പാനിഷ് ലീഗിൽ കിരീട പ്രതീക്ഷ നിലനിർത്തി റയൽ മാഡ്രിഡ്. ഇന്ന് ലീഗിൽ ഗ്രാനഡയെ അവരുടെ തട്ടകത്തിൽ നടന്ന മത്സരത്തിൽ ഒന്നിനെതിരെ നാലു ഗോളുകൾക്കായിരുന്നു റയലിന്റെ വിജയം. ഇരു ടീമിലെയും പ്രധാന താരങ്ങളിൽ പലരും പരിക്ക് കാരണം ഇന്ന് കളത്തിലിറങ്ങിയില്ല. 17-ാം മിനുട്ടിലായിരുന്നു റയലിന്റെ ആദ്യ ഗോൾ. മധ്യനിര താരം മോഡ്രിച്ചിന്റെ വകയായിരുന്നു റയലിന്റെ ഗോൾ.

ആദ്യ പകുതിയുടെ അവസാനം റോഡ്രിഗോ(54+1) റയലിന്റെ ലീഡ് ഇരട്ടിയാക്കി. രണ്ടാം പകുതിയിൽ 71-ാം മിനുട്ടിൽ മൊളിനിലൂടെ ഗ്രാനഡ ഗോൾ മടക്കി. എന്നാൽ 75,76 മിനിട്ടുകളിൽ രണ്ട് ഗോളുകൾ നേടി റയൽ മത്സരത്തിൽ ആധിപത്യം നേടി. 75-ാം മിനുട്ടിൽ ഒഡ്രിയിസോളയും 76-ാം മിനുട്ടിൽ ബെൻസെമയുമാണ് റയലിനായി ഗോളുകൾ നേടിയത്.

ഈ വിജയത്തോടെ റയൽ മാഡ്രിഡിന് ലീഗിൽ 78 പോയിന്റുമായി രണ്ടാം സ്ഥാനത്താണ്. ഒന്നാമതുള്ള അത്ലാന്റിക്കോയ്ക്ക് 80 പോയിന്റും മൂന്നാമതുള്ള ബാഴ്‌സലോണയ്ക്ക് 76 പോയിന്റുമാണുള്ളത്. ഇനി ലീഗിൽ രണ്ട് മത്സരങ്ങൾ മാത്രമെ അവശേഷിക്കുന്നുള്ളൂ.