വെസ്റ്റ് ഇൻഡീസ് ലെജൻഡ്സിനെ പരാജയപ്പെടുത്തി ഇന്ത്യൻ ലെജൻഡ്സിന് ജയം

റോഡ് സേഫ്റ്റി വേൾഡ് സീരിസിലെ ആദ്യ സെമിഫൈനലിൽ ഇന്ത്യൻ ലെജൻഡ്സിന് ജയം. വെസ്റ്റ് ഇൻഡീസ് ലെജൻഡ്സിനെ 12 റൺസിന് പരാജയപ്പെടുത്തിയാണ് ഇന്ത്യൻ ഫൈനൽ ബർത്തുറപ്പിച്ചത്. ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറിൽ മൂന്ന് വിക്കറ്റ് നഷ്ടത്തിൽ 218 റൺസ് കുറിച്ചു. മറുപടി ബാറ്റിംഗിനിറങ്ങിയ വിൻഡീസ് 20 ഓവറിൽ ആറ് വിക്കറ്റ് നഷ്ടത്തിൽ 206 റൺസ് നേടാനായുള്ളൂ. 65 റൺസ് നേടിയ സച്ചിൻ ടെൻഡുൽക്കരും 20 പന്തുകളിൽ 49 റൺസെടുത്ത യുവരാജിന്റെ ഇന്നിങ്‌സുകളാണ് ഇന്ത്യക്ക് കൂറ്റൻ സ്കോർ സമ്മാനിച്ചത്.

20 പന്തുകളിൽ 37 റൺസെടുത്ത യൂസഫ് പത്താനും, ആദ്യ പന്തിൽ തന്നെ ബൗണ്ടറി അടിച്ചു തുടങ്ങിയ സെവാഗും (35) ഇന്ത്യൻ സ്കോറിന് നിർണായക പങ്കുവഹിച്ചു. സച്ചിനും സെവാഗും 56 റൺസിന്റെ ആദ്യ വിക്കറ്റ് കൂട്ടുകെട്ട് പടുത്തുയർത്തിയെങ്കിലും ടിനോ ബെസ്റ്റിന് വിക്കറ്റ് നൽകി സെവാഗ് മടങ്ങി. തുടർന്ന് ഗ്രീസിലെത്തിയ കൈഫ്-സച്ചിൻ സഖ്യം 53 റൺസിന്റെ മികച്ച ഇന്നിംഗ്സ് പടുത്തുയർത്തി. ഡ്വെയ്ൻ സ്മിത്ത്(63), നർസിംഗ് ഡിയോനാരിൻ (59), ബ്രയാൻ ലാറ (46) വിൻഡീസിനുവേണ്ടി പൊരുതിനോക്കിയെങ്കിലും 12 റൺസ് അകലെ ഇന്നിംഗ്സ് അവസാനിച്ചു.