ബിനീഷിന് സ്വാഭാവിക ജാമ്യം ലഭിക്കില്ല; കുറ്റപത്രം സമർപ്പിച്ച് ഇ.ഡി, പൂട്ടിട്ട് ഉദ്യോഗസ്ഥർ

കള്ളപ്പണം വെളുപ്പിക്കൽ കേസിൽ ബിനീഷ് കോടിയേരിക്കെതിരെ കുറ്റപത്രം സമർപ്പിച്ച് എൻഫോഴ്സ്മെന്റ്. പ്രാഥമിക കുറ്റപത്രമാണ് ഇ ഡി ബെംഗളൂരു സെഷൻസ് കോടതിയിൽ സമർപ്പിച്ചത്. ബിനീഷിനെ അറസ്റ്റ് ചെയ്ത് 60 ദിവസം പൂർത്തിയാകാനിരിക്കേയാണ് ഇ.ഡിയുടെ ധൃതിയിലുള്ള നടപടി.

ഒക്ടോബർ 29 ന് അറസ്റ്റിലായ ബിനീഷിനെതിരെ 60 ദിവസത്തിനകം കുറ്റപത്രം നൽകിയില്ലെങ്കിൽ സ്വാഭാവിക ജാമ്യം ലഭിക്കുമെന്ന് കോടതി അറിയിച്ചിരുന്നു. ഇത് തടയാനാണ് ഇ ഡിയുടെ നീക്കം. ഇതോടെ, ബിനീഷിനു സ്വാഭാവിക ജാമ്യം ലഭിക്കില്ല.

നിലവിൽ പരപ്പന അഗ്രഹാര ജയിലിലാണ് ബിനീഷ് കോടിയേരി റിമാൻഡിൽ കഴിയുന്നത്. കേസിൽ ജാമ്യാപേക്ഷ തള്ളിയ സെഷൻസ് കോടതിയുടെ നടപടിക്കെതിരെ ഹൈക്കോടതിയെ സമീപിക്കാൻ ബിനീഷ് ഒരുങ്ങുന്നുവെന്ന വാർത്തയും ഇതിനോടകം പുറത്തുവന്നിരുന്നു.