മംഗളൂരു: നടനും നൃത്തസംവിധായകനുമായ കിഷോര്‍ അമാന്‍ ഷെട്ടി ഉള്‍പ്പെട്ട മയക്കുമരുന്ന് കേസില്‍ കന്നഡ ടെലിവിഷന്‍ അവതാരക അനുശ്രീയെ നാലുമണിക്കൂറിലേറെ സമയം കേന്ദ്ര ക്രൈംബ്രാഞ്ച് പോലീസ് ചോദ്യെ ചെയ്തു. മയക്കുമരുന്ന് ഉപയോഗത്തില്‍ പ്രശസ്ത ടിവി വ്യക്തികള്‍ ഉള്‍പ്പെട്ട കേസുകള്‍ എന്നിവ സംബന്ധിച്ച് മംഗളൂരു പോലീസ് സമാന്തര അന്വേഷണം നടത്തിവരികയാണ്.
രണ്ട് ദിവസം മുമ്പ് മംഗളൂരു പോലീസ് വിളിച്ച ആദ്യത്തെ ടിവി വ്യക്തിത്വമാണ് അനുശ്രീ. സംസ്ഥാന തലസ്ഥാനമായ ബെംഗളൂരുവില്‍ നിന്ന് 351 കിലോമീറ്റര്‍ അകലെ കര്‍ണാടകയിലെ ഒരു തീരദേശ നഗരമായ മംഗളൂരു വിനോദസഞ്ചാര കേന്ദ്രത്തില്‍ വച്ചാണ് എംഡിഎംഎ ഗുളികകള്‍ കൈവശം വച്ചുവെന്നാരോപിച്ച് രണ്ടാഴ്ച മുമ്പ് മംഗളൂരു സിസിബി പോലീസ് കിഷോര്‍ അമാന്‍ ഷെട്ടിയെ അറസ്റ്റ് ചെയ്തത്.
പ്രഭുദേവ സംവിധാനം ചെയ്ത ജനപ്രിയ ബോളിവുഡ് ഫ്രാഞ്ചൈസിയായ എബിസിഡി എന്ന ചിത്രത്തിലെ അഭിനയത്തോടൊപ്പം പ്രശസ്തനായ ഒരു സെലിബ്രിറ്റിയാണ് ഷെട്ടി. ചോദ്യം ചെയ്യലിനിടെ, തന്റെ കൊറിയോഗ്രാഫര്‍ സുഹൃത്ത് തരുണ്‍ രാജിനെക്കുറിച്ച് ഷെട്ടി മൊഴി നല്‍കിയിരുന്നു. ഷെട്ടിയുടെ കാമുകി അസ്‌കയെ അറസ്റ്റ് ചെയ്ത ശേഷം കഴിഞ്ഞയാഴ്ചയാണ് തരുണിനെ അറസ്റ്റ് ചെയ്തത്. അസ്‌കയ്ക്കും തരുണ്‍ രാജിനും അനുശ്രീയെ അറിയാമായിരുന്നുവെന്ന് പോലീസ് പറയുന്നു.
ചോദ്യം ചെയ്യല്‍ പൂര്‍ത്തിയായ ശേഷം മാധ്യമപ്രവര്‍ത്തകരോട് സംസാരിച്ച അനുശ്രീ, 12 വര്‍ഷങ്ങള്‍ക്ക് മുമ്പ് തരുണിനെയും കിഷോറിനെയും അറിയാമായിരുന്നുവെന്നും അവര്‍ ഒരു ഷോയ്ക്ക് തന്നെ നൃത്തം പഠിപ്പിച്ചിരുന്നുവെന്നും എന്നാല്‍ പിന്നീട് ബന്ധമുണ്ടായിട്ടില്ലെന്നും പറഞ്ഞു.
മയക്കുമരുന്ന് വിമുക്ത സമൂഹത്തിനായി താന്‍ എല്ലായ്‌പ്പോഴും പ്രവര്‍ത്തിച്ചിട്ടുണ്ടെന്നും അവര്‍ പറഞ്ഞു. പോലീസ് തന്നോട് ചോദിച്ചതിനെല്ലാം തനിക്ക് അറിയാവുന്ന എല്ലാ കാര്യങ്ങളും പറഞ്ഞിട്ടുണെന്നും പോലീസ് തന്നെ വീണ്ടും വിളിച്ചാല്‍ താന്‍ ഇവിടെ വന്ന് സഹകരിക്കുമെന്നും അനുശ്രീ വ്യക്തമാക്കി.
അതേസമയം തനിക്കും കുടുംബത്തിനും എതിരെ മാധ്യമങ്ങള്‍ അടിസ്ഥാനരഹിതമായ കഥകള്‍ എഴുതരുതെന്ന് താരം പറഞ്ഞു. ‘എന്നെ പോലീസ് വിളിപ്പിച്ചു. ഞാന്‍ അവിടെ ഹാജരാകാന്‍ പോകുന്നു. അന്വേഷണം നടത്തട്ടെ. ഞാന്‍ അവരുമായി പൂര്‍ണമായും സഹകരിക്കും. പക്ഷേ, മാധ്യമങ്ങള്‍ എനിക്കെതിരെ അടിസ്ഥാനരഹിതമായ കഥകള്‍ എഴുതുന്നതില്‍ നിന്ന് വിട്ടുനില്‍ക്കണം. കാരണം, പോലീസ് വിളിപ്പിച്ചു എന്നു കരുതി ഒരാള്‍ പ്രതിയോ കുറ്റവാളിയോ ആകില്ല. മാധ്യമങ്ങള്‍ എന്റെ വ്യക്തിപരമായ അന്തസ്സിനെ മാനിക്കണം, ”അനുശ്രീ ഫെയ്‌സ്ബുക്കില്‍ കുറിച്ചു.
Post Your Comments