ബിജ്‌നോർ•അമ്രോഹ ജില്ലയിൽ അടുത്തിടെ ഭേദഗതി ചെയ്ത പൗരത്വ നിയമത്തിന്റെയും നാഷണൽ രജിസ്റ്റർ ഓഫ് സിറ്റിസൺസിന്റെയും (എൻആർസി) നേട്ടങ്ങൾ വിശദീകരിക്കാൻ ശ്രമിക്കുന്നതിനിടെ ബി.ജെ.പി നേതാവിന് മര്‍ദ്ദനം. പാർട്ടിയുടെ ന്യൂനപക്ഷ വിഭാഗമായ ന്യൂനപക്ഷ മോര്‍ച്ചയുടെ ജില്ലാ ജനറൽ സെക്രട്ടറി മുർതജ ആഗ ഖാസ്മിയ്ക്ക് നേരെയാണ് വെള്ളിയാഴ്ച അമ്രോഹയിലെ ലകാഡ മൊഹല്ലയിൽ വച്ച് ആക്രമണമുണ്ടായത്.
പൗരത്വ നിയമത്തെയും എന്‍.ആര്‍.സിയേയും കുറിച്ച് ജനങ്ങളിൽ, പ്രത്യേകിച്ച് മുസ്‌ലിംകളിൽ ആത്മവിശ്വാസം വളർത്തുന്നതിനായാണ് ബി.ജെ.പിയുടെ ന്യൂനപക്ഷ വിഭാഗം പ്രാദേശികമായി പരിപാടികള്‍ സംഘടിപ്പിക്കുകയും ജനങ്ങളെ അറിയിക്കുകയും ചെയ്യുന്നത്. സി‌എ‌എയും എൻ‌ആർ‌സിയും ഇന്ത്യയിൽ താമസിക്കുന്ന മുസ്‌ലിംകളുടെ അവകാശങ്ങളും പൗരത്വവും കവർന്നെടുക്കില്ല, അവർ നിയമത്തിനെതിരെ പ്രതിഷേധിക്കുന്നത് ഒഴിവാക്കണമെന്നും ന്യൂനപക്ഷ മോര്‍ച്ച ആവശ്യപ്പെടുന്നു.
വെള്ളിയാഴ്ച അമ്രോഹയിലെ ലകാഡ മൊഹല്ലയിലെ ഒരു കടയിൽ പോയി, സി‌എ‌എയെക്കുറിച്ചും എൻ‌ആർ‌സിയെക്കുറിച്ചും മുസ്‌ലിംകളിൽ അവബോധം സൃഷ്ടിക്കാൻ ശ്രമിക്കുകയായിരുന്നുവെന്നും അപ്പോള്‍ റാസ അലി എന്നൊരാള്‍ തന്നെ വന്ന് ആക്രമിക്കുകയായിരുന്നുവെന്ന് ഖസ്മി പറഞ്ഞു.
‘അയാള്‍ എന്നെ കഴുത്തു ഞെരിച്ച് കൊല്ലാൻ ശ്രമിച്ചു, എങ്ങനെയെങ്കിലും ഞാൻ രക്ഷപ്പെട്ടു. വെള്ളിയാഴ്ച വൈകുന്നേരം അറസ്റ്റിലായ പ്രതിക്കെതിരെ ഞങ്ങൾ കേസ് രജിസ്റ്റർ ചെയ്തിട്ടുണ്ട്., ‘ – ഖസ്മി പറഞ്ഞു.
കഴിഞ്ഞ വെള്ളിയാഴ്ച അമ്രോഹയിൽ നടന്ന അക്രമാസക്തമായ പ്രതിഷേധത്തിന് ശേഷം പോലീസ് ജാഗ്രതയിലാണ്. എന്നാല്‍, ഈ വെള്ളിയാഴ്ച ജില്ലയിൽ നിന്ന് അക്രമങ്ങളൊന്നും റിപ്പോർട്ട് ചെയ്തിട്ടില്ല.
Post Your Comments