സംസ്ഥാനത്ത് മണ്‍സൂണ്‍ മഴ എത്തുന്നു; ഇത്തവണ ലഭ്യമാകുന്നത് ശരാശരിയിലും താഴെ

തിരുവനന്തപുരം: ജൂണ്‍ നാലിന് കേരളത്തില്‍ ഈ വര്‍ഷത്തെ മണ്‍സൂണ്‍ മഴക്കാലം തുടങ്ങുമെന്ന് സ്വകാര്യ കാലാവസ്ഥാ നിരീക്ഷണ കേന്ദ്രമായ സ്‌കൈമെറ്റ്. സാധാരണ ജൂണ്‍ ഒന്നിനാണ് മഴ എത്തേണ്ടതെങ്കിലും മൂന്ന് ദിവസം വൈകിയേ മഴയെത്തൂവെന്നാണ് റിപ്പോര്‍ട്ട് പറയുന്നത്. ഇന്ത്യയില്‍ മണ്‍സൂണ്‍ മഴക്കാലം ആദ്യം എത്തുന്നത് ആന്തമാന്‍ നിക്കോബാര്‍ ദ്വീപുകളിലാണ്. മെയ് 22 ന് ഇവിടെ മണ്‍സൂണ്‍ മഴ പെയ്ത് തുടങ്ങും. എന്നാല്‍ ഇന്ത്യയില്‍ നാല് മേഖലകളിലും ശരാശരിയില്‍ കുറവ് മഴ മാത്രമേ ലഭിക്കൂവെന്നും റിപ്പോര്‍ട്ട് വ്യക്തമാക്കുന്നുണ്ട്. രാജ്യത്ത് ഇത്തവണ 93% മഴയാണ് ലഭിക്കുക. മൊത്തം മഴയുടെ 70% ലഭിക്കുന്നതു മണ്‍സൂണ്‍ കാലത്താണ്.

ഇന്ത്യയുടെ കിഴക്ക്, വടക്കുകിഴക്ക്,മധ്യ മേഖലകളിലുള്ള സംസ്ഥാനങ്ങളില്‍ ദക്ഷിണേന്ത്യയില്‍ ലഭിക്കുന്നതിനേക്കാള്‍ വളരെ കുറവ് മഴ മാത്രമേ ലഭിക്കൂ. കഴിഞ്ഞ ആഴ്ച സ്‌കൈമെറ്റ് പുറത്തുവിട്ട റിപ്പോര്‍ട്ടില്‍ ശരാശരി മഴ ലഭിക്കുമെന്ന് പറഞ്ഞിരുന്നു. എന്നാല്‍ മാറിയ കാലാവസ്ഥാ സാഹചര്യങ്ങളില്‍ കുറവ് മഴ മാത്രമേ ലഭിക്കൂവെന്നാണ് വ്യക്തമാക്കിയിരിക്കുന്നത്. കേരളത്തില്‍ കഴിഞ്ഞ മണ്‍സൂണ്‍ കാലത്തുണ്ടായ പ്രളയദുരന്തത്തില്‍ നിന്നും ഇനിയും കരകയറാനായിട്ടില്ല. മണ്‍സൂണ്‍ എത്താന്‍ മൂന്ന് ആഴ്ചകൂടിയെ ഉള്ളു. ജൂണ്‍ ഒന്നുമുതല്‍ 15 വരെയുള്ള ദിവസങ്ങള്‍ക്കിടെയാണ് കേരളത്തില്‍ മണ്‍സൂണ്‍ എത്തുന്നത്.