സാഹസിക വിനോദ സഞ്ചാരികളെ കാത്ത് ചെറായി ബീച്ച്

കൊച്ചി: ചെറായി ബീച്ചില്‍ വിവിധ സാഹസിക ജല കായിക വിനോദങ്ങളാണ് സഞ്ചാരികളെ കാത്തിരിക്കുന്നത്. ജില്ലാ ടൂറിസം പ്രമോഷന്‍ കൗണ്‍സിലിന്റെ അംഗീകാരത്തോടെ ചെറായി വാട്ടര്‍ സ്‌പോര്‍ട്‌സാണ് സേവനദാതാവെന്ന നിലയില്‍ വിവിധ വാട്ടര്‍ സ്‌പോര്‍ട്ട്‌സുകള്‍ സംഘടിപ്പിക്കുന്നത്. ഗോവന്‍ ബീച്ചിലെ വാട്ടര്‍ സ്‌പോര്‍ട്‌സ് സൗകര്യങ്ങളുള്ള കേരളത്തിലെ ഏക ബീച്ചാണ് ചെറായി. സ്പീഡ് ബോട്ട് റൈഡ്, ബനാന റൈഡ്, ബംബര്‍ റൈഡ്, വാട്ടര്‍ സ്‌കൈ,ബൂഗി ബോര്‍ഡ്‌സ്, കാറ്റാമാരന്‍, ലേ ലോ റൈഡ്, വിന്‍ഡ് സര്‍ഫിംഗ്, കയാക്കിങ്, സ്‌ക്യൂബ ഡൈവിങ്, ജെറ്റ് സ്‌കി വാട്ടര്‍ സ്‌കൂട്ടര്‍, കെ റ്റി വി ബീച്ച് ബൈക്ക് തുടങ്ങിയ സാഹസിക വിനോദങ്ങള്‍ സഞ്ചാരികള്‍ക്ക് ചെറായി വാട്ടര്‍ സ്‌പോര്‍ട്‌സിന്റെ സഹായത്തോടെ ആസാദിക്കാം. രാവിലെ 8 മണി മുതല്‍ വൈകിട്ട് 6.30 വരെ ഈ സൗകര്യങ്ങള്‍ ആസ്വദിക്കാനാകും.

കൂടാതെ കയാക്കിംഗ്, വിന്‍ഡ് സര്‍ഫിംഗ്, കാറ്റാമാരന്‍, അഡ്വാന്‍സ്ഡ് സീ സ്വിമ്മിംഗ് , ജെറ്റ്‌സ്‌കി എന്നിവയില്‍ വിദഗ്ദരുടെ നേതൃത്വത്തില്‍ ട്രെയിനിങ്ങും ലഭിക്കും. 5 മുതല്‍ 65 വയസ്സ് വരെ പ്രായമുള്ളവര്‍ക്ക് ട്രെയിനിംഗ് ലഭിക്കും. നെതര്‍ലാന്‍ഡ്‌സ് നിര്‍മിത നാക്ര 570, നാക്ര 20, ഹോബി ക്യാറ്റ് ടൈഗര്‍ എന്നീ കാറ്റാമാരന്‍ റൈഡുകളാണ് സാഹസിക സഞ്ചാരികള്‍ക്കായി ഒരുക്കിയിരിക്കുന്നത്. വാഴപ്പഴം പോലെ മഞ്ഞ നിറത്തിലുള്ള ബനാന ബോട്ട് പ്രധാന ആകര്‍ഷണങ്ങളില്‍ ഒന്നാണ്. വാട്ടര്‍ സ്‌കീയിംഗും സര്‍ഫിങും പോലെ തന്നെ ത്രില്ല് നല്‍കുന്നതാണ് ബനാനാ ബോട്ട് റൈഡ്. മാത്രമല്ല വാട്ടര്‍ സ്‌കീയിംഗ്, സര്‍ഫിങ് എന്നിവയെ അപേക്ഷിച്ച് വളരെ അനായാസം റൈഡ് ചെയ്യാവുന്നതും സുരക്ഷിതവുമാണ്.

1500 രൂപയ്ക്ക് ബനാന, ക്യാറ്റമാരന്‍, ബമ്പര്‍ എന്നീ 3 കോമ്പോ റൈഡുകളും 3500 രൂപയ്ക്ക് ബനാന , ക്യാറ്റമാരന്‍, സ്പീഡ് ബോട്ട് , ലേ ലോ , കയാക്കിങ്, ബൂഗി ബോര്‍ഡ് എന്നീ 7 കോമ്പോ റൈഡുകള്‍ ആസ്വദിക്കാം. കൂടാതെ 300 രൂപയ്ക്ക് ബനാന റൈഡ്, 450 രൂപയ്ക്ക് സ്പീഡ് ബോട്ട് റൈഡ്, 750 രൂപയ്ക്ക് ക്യാറ്റമാരന്‍ , 300 രൂപയ്ക്ക് ഒരാള്‍ക്ക് കയാക്കിങ് , 375 രൂപയ്ക്ക് ലേ ലോ, റൈഡ്, 150 രൂപയ്ക്ക് ബൂഗി ബോര്‍ഡ് , 375 രൂപയ്ക്ക് ബമ്പര്‍ റൈഡ് , 1500 രൂപയ്ക്ക് നീ ബോര്‍ഡ് റൈഡ്, 525 രൂപയ്ക്ക് ജെറ്റ് സ്‌കി, 1500 രൂപയ്ക്ക് ഒരു മണിക്കൂര്‍ സ്‌കൂബാ ഡൈവിങ് എന്നിവ നടത്താം. വേനലവധിക്കാലമായതിനാല്‍ 33% ഓഫറും സാഹസിക വിനോദ സഞ്ചാരികള്‍ക്ക് ലഭിക്കും.

പ്ലാസ്റ്റിക്ക് മുക്ത ബീച്ചാക്കാന്‍ കുടുംബശ്രീ വനിതകളുടെ നേതൃത്വത്തില്‍ പ്ലാസ്റ്റിക്ക് മാലിന്യങ്ങള്‍ ശേഖരിച്ച് സംസ്‌ക്കരണത്തിനായി പള്ളിപ്പുറം പഞ്ചായത്തിന് നല്‍കുന്നുണ്ട്. ഡിറ്റിപിസിയുടെ ഈഫര്‍മേഷന്‍ സെന്ററിന്റെ പ്രവര്‍ത്തനവും ഭിന്നശേഷി സൗഹൃദ ടോയ്‌ലറ്റും ബീച്ചില്‍ ഉടന്‍ ആരംഭിക്കും. ബീച്ചില്‍ അടിസ്ഥാന സൗകര്യങ്ങള്‍ ഒരുക്കുന്നതിന് ഗ്രീന്‍ കാര്‍പെറ്റ് പദ്ധതിയുടെ ഭാഗമായി ഹെഡ്മാസ് ലൈറ്റുകള്‍ സ്ഥാപിച്ചിട്ടുണ്ട്.

ടൂറിസം കേന്ദ്രങ്ങളില്‍ അടിസ്ഥാന സൗകര്യം ഒരുക്കുന്നതിനൊപ്പം സഞ്ചാരികള്‍ക്ക് നൂതനവും ഓര്‍മയില്‍ എന്നും നില്‍ക്കുന്നതുമായ വിനോദസഞ്ചാരാനുഭവമാണ് വാട്ടര്‍ സ്‌പോര്‍ട്‌സ് ഒരുക്കിയിരിക്കുന്നത് . കൂടാതെ ലൈഫ് ഗാര്‍ഡുകളുടെ സേവനവും ഭിന്നശേഷി സൗഹൃദ വോക്ക് വേ സൗകര്യവും, വീല്‍ച്ചെയറുകളുമുണ്ട്. ഡി റ്റി പി സി യുടെ സന്ദര്‍ശന കേന്ദ്രം വഴി മുന്‍കൂട്ടി ബുക്ക് ചെയ്യാം. വാഹന പാര്‍ക്കിങ്ങിനുള്ള പ്രത്യേക സൗകര്യവും ഡി റ്റി പി സി ഒരുക്കിയിട്ടുണ്ട്.