അരിമ്പാറ ഉരുകിപ്പോകും എന്ന വൈദ്യന്റെ വാക്ക് കേട്ട് മരുന്ന് പുരട്ടിയപ്പോൾ ഉരുകിപ്പോയത് വിരലുകൾ; മുറിവൈദ്യന്മാരെ കാണുന്നവർക്ക് മുന്നറിയിപ്പുമായി ഒരു കുറിപ്പ്

മുറിവൈദ്യന്മാരെ കാണാൻ പോകുന്നവർക്ക് മുന്നറിയിപ്പുമായി ഒരു കുറിപ്പ്. സുധീർ എന്നയാളാണ് ഒരു വ്യക്തിയുടെ കൈവിരലുകളുടെ ചിത്രം പങ്കുവെച്ചുകൊണ്ട് ഫേസ്ബുക്കിൽ കുറിപ്പ് ഇട്ടിരിക്കുന്നത്. ആശുപത്രിയിൽ വന്ന ഒരാളുടെ കൈവിരലിൻ്റെ ഫോട്ടോ ആണിതെന്നും കണ്ണൂരിൽ നിന്നോ മറ്റോ വന്ന ഒരു ലാടവൈദ്യൻ അരിമ്പാറ പോകാനായി ഒരു മരുന്ന് പുരട്ടിക്കൊടുത്തുവെന്നും കുറിപ്പിൽ പറയുന്നു. ഒറ്റപ്രാവശ്യം പുരട്ടിക്കൊടുത്തതിന് 50 രൂപയും വാങ്ങി. ഇന്നലെയാണ് മരുന്ന് പുരട്ടിയത്. ഇന്നത്തെ അവസ്ഥയാണ് ചിത്രത്തിൽ കാണുന്നതെന്നാണ് യുവാവ് വ്യക്തമാക്കുന്നത്. മരുന്നു പുരട്ടിയ ഇടം ഉള്ളിലേക്ക് തുളഞ്ഞുപോയിരിക്കുന്നത് ചിത്രത്തിൽ കാണാം.

ഫേസ്ബുക്ക് പോസ്റ്റിന്റെ പൂർണരൂപം;

എത്രയായാലും നമ്മൾ പഠിക്കില്ലാ..

ഇന്ന് ആശുപത്രിയിൽ വന്ന ഒരാളുടെ കൈവിരലിൻ്റെ ഫോട്ടോ ആണിത്. പാവം അവരുടെ കൈവിരലുകളിൽ അരിമ്പാറ എന്ന പ്രശ്നം ഉണ്ടായിരുന്നു. കണ്ണൂരിൽ നിന്നോ മറ്റോ വന്ന ഒരു ലാടവൈദ്യൻ അരിമ്പാറ പോകാനായി ഒരു മരുന്ന് പുരട്ടിക്കൊടുത്തു. ഒറ്റപ്രാവശ്യം പുരട്ടിക്കൊടുത്തതിന് 50 രൂപയും വാങ്ങി. ഇന്നലെയാണ് മരുന്ന് പുരട്ടിയത്. ഇന്നത്തെ അവസ്ഥയാണ് ചിത്രത്തിൽ കാണുന്നത്.

മരുന്നു പുരട്ടിയ ഇടം ഉള്ളിലേക്ക് തുളഞ്ഞുപോയിരിക്കുന്നു. കണ്ടാൽ പേടിയാകും. ഒറ്റപ്രാവശ്യം മരുന്ന് പുരട്ടിയാൽ അരിമ്പാറ ഉരുകിപ്പോകും എന്നാണത്രേ വൈദ്യൻ അവകാശപ്പെട്ടത്! ഇതിപ്പോ വിരലും ഉരുകി എന്ന് മാത്രം! മരുന്നിൻ്റെ ശക്തി കണ്ടിട്ട് അത് 100% സൾഫ്യൂരിക് ആസിഡ് ആകാനാണ് സാധ്യത! നിറം കിട്ടാനായി വല്ല പച്ചിലയും ചേർത്താൽ മതിയല്ലോ! എന്നിട്ട് രണ്ടുതുള്ളി 50 രൂപയ്ക്ക് വിറ്റാൽ തീരെ ലാഭം കിട്ടുകയുമില്ലാ!!

നമ്മുടെ ശരീരത്തിൻ്റെ പ്രതിരോധശേഷി കുറയുമ്പോൾ ബാധിക്കുന്ന ഒരിനം വൈറസ് ഉണ്ടാക്കുന്ന രോഗമാണ് അരിമ്പാറ. ഭൂരിഭാഗം കേസുകളിലും ഇത് തനിയെ അപ്രത്യക്ഷമാകുകയും ചെയ്യും. അത് ഒരു സൗന്ദര്യപ്രശ്നമായിട്ട് തോന്നുന്നു എങ്കിൽ നല്ല ഒരു ത്വക് രോഗ വിദഗ്ദനെ കണ്ടാൽ അത് ഇല്ലാതാക്കാൻ ശാസ്ത്രീയമായ പല മാർഗ്ഗങ്ങളും ഇന്ന് ആധുനിക വൈദ്യശാസ്ത്രത്തിൽ ലഭ്യമാണ് എന്നിരിക്കെ ഇത്തരം ഉടൻകൊല്ലി ലാടവൈദ്യൻമാരുടെ ചികിത്സ തേടുന്നവർക്ക് ഇതൊരു പാഠമായിരിക്കേണ്ടതാണ്…

വേണമെങ്കിൽ ഒന്ന് ഷെയർ ചെയ്തേക്ക്.. വായിച്ച് ആർക്കെങ്കിലും നല്ല ബുദ്ധി തോന്നിയാൽ തോന്നട്ടേ…

നിങ്ങൾക്കോ കുടുംബാംഗങ്ങൾക്കോ എന്തെങ്കിലും വിധത്തിലുള്ള ആരോഗ്യപ്രശ്നങ്ങൾ വന്നാൽ നിങ്ങളുടെ കുടുംബഡോക്ടറെ കാണിക്കുക. അല്ലെങ്കിൽ അടുത്തുള്ള ഏതെങ്കിലും ഒരു യോഗ്യതയുള്ള ഡോക്ടറെ കാണിക്കുക. ആയുർവ്വേദചികിത്സ വേണമെന്നുള്ളവർ BAMS പാസ്സായ അല്ലെങ്കിൽ അംഗീകൃത ചികിത്സകനായ ഒരു ആയുർവ്വേദ ഡോക്ടറെ കാണുക. യാതൊരു കാരണവശാലും ഉടൻകൊല്ലികളെ ആശ്രയിക്കാതിരിക്കുക.. ഇതൊക്കെ ഒരു 100 വട്ടം പറഞ്ഞതാണ്.. അനുസരിച്ചാൽ അവനവന് കൊള്ളാം.