ഐ ലീഗ് ഫുട്ബോളിൽ കിരീട സാധ്യത ആർക്കെന്നു ഇന്നറിയാം

ചെന്നൈ : ഐ ലീഗ് ഫുട്ബോളിൽ കിരീടം ആര് സ്വന്തമാക്കുമെന്നു ഇന്നറിയാം. വൈകിട്ട് അഞ്ചിന് ചർച്ചിൽ ബ്രദേഴ്സ് ഗോവയും ചെന്നൈ സിറ്റിയും തമ്മിലാണ് ഏറ്റുമുട്ടുക. ചർച്ചിലിന്‍റെ ഹോംഗ്രൗണ്ടിൽ നടക്കുന്ന മത്സരത്തിൽ പോയിന്‍റ് പട്ടികയിൽ ഒന്നാമനായ ചെന്നൈ ജയിച്ചാൽ ഒരുമത്സരം നിലനിൽക്കെ തന്നെ കിരീടം സ്വന്തമാക്കാം. 18 ഗോൾ നേടിയ സ്പാനിഷ് താരം പെഡ്രോ മാൻസിയുടെ മികവിൽ പതിനെട്ട് മത്സരങ്ങളിൽ 40 പോയിന്‍റുമായാണ് ചെന്നൈ കിരീടത്തിലേക്ക് കുതിക്കുക.

നേരത്തെ ചെന്നൈയിൽ നടന്ന മത്സരത്തിൽ ചർച്ചിൽ ഒന്നിനെതിരെ മൂന്ന് ഗോളിന് പരാജയപ്പെട്ടിരുന്നു. 36 പോയിന്റുമായി രണ്ടാം സ്ഥാനത്താണ് ഈസ്റ്റ് ബംഗാൾ. മിനർവ പഞ്ചാബിനേയും ഗോകുലം കേരളയെയും തോൽപിക്കുകയും ചെന്നൈ സിറ്റി ചർച്ചിലിനോടും മിനർവയോടും പരാജയപ്പെട്ടാൽ മാത്രമേ ഈസ്റ്റ് ബംഗാളിന് കിരീട സാധ്യതയൊള്ളൂ.