ചെറുവത്തൂര്‍: കാടങ്കോട് ഗവ.ഫിഷറീസ് വൊക്കേഷനല്‍ ഹയര്‍ സെക്കന്‍ഡറി സ്‌കൂളിന്റെ ക്ലാസ് മുറിക്ക് സാമൂഹിക ദ്രോഹികള്‍ തീയിട്ടു. മുറിയിലുണ്ടായിരുന്ന അലമാരയിലും മുകളിലും സൂക്ഷിച്ചിരുന്ന പുസ്തകങ്ങളും കുട്ടികളുടെ പ്രോജകട് റിപ്പോര്‍ട്ടുകളും കത്തിനശിച്ചു. നെല്ലിക്കാല്‍ ഭഗവതി ക്ഷേത്രത്തിന് സമീപത്തെ യുപി വിഭാഗത്തിലെ 6ാംക്ലാസ് മുറിയിലാണ് ജനാലയുടെ ഗ്ലാസ് തകര്‍ത്ത് അതില്‍കൂടി മുറിയിലേക്ക് തീ എറിഞ്ഞത്. ഇന്നലെ രാവിലെ അധികൃതര്‍ സ്‌കൂള്‍ തുറക്കാന്‍ എത്തിയപ്പോഴാണ് സംഭവം ശ്രദ്ധയില്‍പ്പെട്ടത്. തീ കത്തുമ്പോള്‍ പൂഴിയെറിഞ്ഞ് കെടുത്തുവാനുള്ള നീക്കവും നടന്നതായി സംശയിക്കുന്നു. മുറിയില്‍ പൂഴി വിതറിയ നിലയിലും മുറിക്ക് പുറത്ത് പൂഴി നിറച്ച കൂട്ടയും കണ്ടെത്തി. ചന്തേര പൊലീസില്‍ വിവരമറിയിച്ചതിനെ തുടര്‍ന്ന് പൊലീസെത്തി കേസെടുത്തു.
Post Your Comments