സ്വര്‍ണവ്യാപാരിയെ വീട്ടില്‍ കയറി വെട്ടിയ സംഭവം: നാലുപേരെ കസ്റ്റഡിയിലെടുത്തു

കായംകുളം : സ്വര്‍ണവ്യാപാരിയെ വീട്ടില്‍ കയറി വെട്ടിയ സംഭവത്തിൽ നാലുപേരെ പോലീസ് കസ്റ്റഡിയിലെടുത്തു. എരുവ കിഴക്ക് സ്വദേശികളായ അനന്ദു ഭവനത്തിൽ അനന്ദു (18) കുന്നത്തറയിൽ വീട്ടിൽ സുജിത്ത്(33), കടവശ്ശേരിവടക്കതിൽ വിശാഖ്(19), കളീക്കൽ വീട്ടിൽ കാർത്തിക്(21) എന്നിവരെയാണ് പോലീസ് അറസ്റ്റ് ചെയ്തത്.

കഴിഞ്ഞ 25ന് രാത്രിയാണ് മാളിയേക്കൽ ജ്വല്ലറി ഉടമ പെരുങ്ങാലമുറി ഷാജഹാനെ (52) ബൈക്കിലെത്തിയ 6 അംഗ സംഘം വീട്ടിൽ കയറി ആക്രമിച്ചത്. മകന്‍ റിയാനെ അന്വേഷിച്ച് വീട്ടില്‍വന്ന സംഘം പിതാവ് ഷാജഹാനെ ആക്രമിക്കുകയും പുറത്ത് കിടന്ന കാറും ബൈക്കും തല്ലിത്തകര്‍ക്കുകയുമായിരുന്നു. ഷാജഹാന്‍ ആലപ്പുഴ മെഡിക്കല്‍കോളജ് ആശുപത്രിയില്‍ ചികിത്സയിലാണ്.

സംഭവസ്ഥലത്തു നിന്ന് ഓടി രക്ഷപ്പെടാൻ ശ്രമിക്കുന്നതിനിടയിൽ ഓടയിൽ വീണു പരിക്കേറ്റ പ്രതികളിലൊരാളായ വിശാഖ് (25) മെഡിക്കൽ കോളജ് ആശുപത്രിയിൽ ചികിത്സയിലാണ്. ഇയാൾ ആശുപത്രി വിടുമ്പോൾ അറസ്റ്റ് രേഖപ്പെടുത്തുമെന്നു പോലീസ് പറഞ്ഞു.