തിരുവന്തപുരം: ഹോളീവുഡ് തുടങ്ങിവെച്ച മീടൂ തുറന്നുപറച്ചില്‍ ഇന്ത്യന്‍ സിനിമാലോകത്തെയും വിവാദങ്ങളുടെ കുഴിയില്‍ വീഴ്ത്തിയിരുന്നു. ഇതിനുപിന്നാലെയാണ് നടിശോഭനയും തുറന്നു പറച്ചിലുമായി രംഗത്തെത്തിയിരിക്കുന്നത്. മീ ടൂ എന്ന് ഹാഷ്ടാഗ് കുറിച്ച ശോഭന വിശദമായ വിവരങ്ങളൊന്നും നല്‍കിയിട്ടില്ല. എന്നാല്‍ പോസ്റ്റിട്ട് നിമിഷങ്ങള്‍ക്കകം തന്നെ ശോഭന പോസ്റ്റ് പിന്‍വലിച്ചു.
അന്താരാഷ്ട്ര തലത്തില്‍ മീടൂ ആരോപണങ്ങള്‍ കത്തിനില്‍ക്കുന്ന അവസരത്തിലാണ് അത് ഇന്ത്യയിലേക്കും എത്തുന്നത്. കഴിഞ്ഞ ഏതാനും നാളുകളായി കേരളത്തിലെ രാഷ്ട്രീയ, മാധ്യമ, സാംസ്‌കാരികമേഖലയിലെ പ്രമുഖരും മീടൂ ആരോപണവിധേയരായിരുന്നു. മലയാളത്തില്‍ നടനും എം.എല്‍.എയുമായ മുകേഷിനെതിരെയും നടന്‍ അലന്‍സിയറിനെതിരെയും മീ ടൂ വെളിപ്പെടുത്തല്‍ ഉണ്ടായിരുന്നു. മലയാള സിനിമയില്‍ നടന്‍ മുകേഷിനെതിരെ ബോളിവുഡ് കാസ്റ്റിംഗ് ഡയറക്ടര്‍ ടെസ ജോസഫായിരുന്നു പരാതിയുമായി എത്തിയത്.
മലയാള സിനിമാരംഗത്തുനിന്ന് മോശം അനുഭവമുണ്ടായെന്ന മീ ടൂ വെളിപ്പെടുത്തലുമായി നടി അര്‍ച്ചന പത്മിനിയും മലയാള സിനിമയിലെ സഹസംവിധായികയും മാധ്യമപ്രവര്‍ത്തകയുമായ അനു ചന്ദ്രയും രംഗത്തെത്തിയിരുന്നു.
മലയാളികളുടെ പ്രിയ താരമായ ശോഭന പോസ്റ്റിട്ട് നിമിഷങ്ങള്‍ക്കകം അത് പിന്‍വലിക്കാനിടയാക്കിയ സാഹചര്യം വ്യക്തമല്ല. പോസ്റ്റ് ഇട്ട് ഉടന്‍ തന്നെ നിരവധി ഷെയറുകളും കമന്റുകളും ഫേസ്ബുക്കില്‍ വന്നിരുന്നു. എന്നാല്‍ പോസ്റ്റ് കൂടുതല്‍ ചര്‍ച്ചയാകുന്നതിനു മുന്‍പ് താരം പോസ്റ്റ് പിന്‍വലിക്കുകയായിരുന്നു. താരത്തിന്റെ പിന്‍മാറ്റതത്തെ കുറിച്ചുള്ള ചര്‍ച്ചകളാണ് ഇപ്പോള്‍ സമൂഹമാധ്യമങ്ങളില്‍ സജീവമായിരിക്കുന്നത്.
Post Your Comments