പാലക്കാട്: ശബരിമല സത്രീ പ്രവേശനത്തെ അനുകൂലിച്ച് മാവോയിസ്റ്റ് പോസ്റ്ററുകള്‍. അട്ടപ്പാടി ചുരം മേഖലയിലെ ആനമൂളി ഭാഗത്താണ് ഇന്നു രാവിലെ പോസ്റ്ററുകള്‍ കണ്ടെത്തിയത്. ശബരിമലയില്‍ പ്രവേശിക്കുന്ന സ്ത്രീകളെ തടയുന്ന ഹിന്ദുഫാസിസ്റ്റ് ശക്തികളെ എതിര്‍ക്കുക, പുരുഷാധിപത്യത്തെ പോരാടി ജയിക്കുക എന്നിങ്ങനെ സ്ത്രീ പ്രവേശനത്തെ അനുകൂലിച്ചുകൊണ്ടുള്ള മുദ്രാവാക്യങ്ങളാണ് പോസ്റ്ററുകളിലുള്ളത്.
അഞ്ച് തരം പോസ്റ്ററുകളാണ് ഇതുവരെ കണ്ടെത്തിയത്. സിപിഐ (മാവോയിസ്റ്റ്) ഭവാനിദളം എന്ന പേരിലാണ് പോസ്റ്ററുകള്‍. രണ്ട് മാസം മുന്‍പ് അട്ടപ്പാടിയിലെ മാവോയിസ്റ്റ് നേതാവ് ഡാനിഷിനെ പോലീസ് അറസ്റ്റ് ചെയ്തിരുന്നു. അതിനു ശേഷം ഇത് രണ്ടാം തവണയാണ് മാവോയിസ്റ്റ് പോസ്റ്റര്‍ പ്രത്യക്ഷപ്പെടുന്നത്.
അതേസമയം സര്‍ക്കാരിനെതിരായ മുദ്രാവാക്യങ്ങളും പോസ്റ്റ്‌റുകളിലുണ്ട്. ജയില്‍പ്പുള്ളികളായ മാവോവാദികളെ മോചിപ്പിക്കുക, ഫാസിസ്റ്റ് നിലപാടുകള്‍ സര്‍ക്കാര്‍ തിരുത്തുക എന്നീ ആവശ്യങ്ങളും പോസ്റ്ററുകളില്‍ രേഖപ്പെടുത്തിയിട്ടുണ്ട്. സംഭവത്തില്‍ അന്വേഷണം ആരംഭിച്ചതായി പോലീസ് അറിയിച്ചു.
Post Your Comments