ജോലി സ്ഥലത്ത് ഇനി നിന്ന് കുഴയേണ്ട ! ഇരുന്ന് സമാധാനത്തോടേ ജോലിയിലേര്‍പ്പെടാം ; ഒാര്‍ഡിനന്‍സ് ഇറങ്ങി

തിരുവനന്തപുരം :   തൊഴില്‍ മേഖലയില്‍ സ്ത്രീകളടക്കം സര്‍വ്വ ജീവനക്കാരും നേരിടുന്ന ഒരു വലിയ വിഷമതയായിരുന്നു ദീര്‍ഘ സമയം നിന്ന് കൊണ്ട് തൊഴില്‍ ഇടങ്ങളില്‍ ജോലി ചെയ്യേണ്ടിവരുകയെന്നത്. മണിക്കൂറുകള്‍ ഒന്ന് ഇരിക്കാന്‍ പോലും കഴിയാതെ ജോലി ചെയ്യേണ്ടിവരുന്ന അവസ്ഥയെപ്പറ്റി സാമൂഹ്യമാധ്യമങ്ങളില്‍ ചര്‍ച്ചയാകുകയും അത് മാധ്യമങ്ങളും ജീവനക്കാര്‍ക്ക് ഇതില്‍ നിന്ന് ഒരു അയവ് ലഭിക്കുന്നതിനായി ഏറ്റ് പിടിച്ച് സമൂഹത്തില്‍ ഒരു ചര്‍ച്ചാവിഷയം തന്നെയായി മാറിയിരുന്നു. ദീര്‍ഘനാളത്തെ കാത്തിരിപ്പിനൊടുവില്‍ ഈ ഒരു പരിതസ്ഥിതിയില്‍ നിന്ന് ഇത്തരം മേഖലയില്‍ ജോലിചെയ്യുന്നവര്‍ക്ക് മോചനം ലഭിച്ചിരിക്കുന്നു.

1960ലെ കേരള കടകളും വാണിജ്യസ്ഥാപനങ്ങളും ആക്ടില്‍ തൊഴിലാളികള്‍ക്കനുകൂലമായ ഭേദഗതികള്‍ വരുത്താനുള്ള ബില്ലിന്റെ അടിയന്തരപ്രാധാന്യം കണക്കിലെടുത്താണ് ഗവര്‍ണര്‍ ഇതുസംബന്ധിച്ച ഓര്‍ഡിനന്‍സ് പുറപ്പെടുവിച്ചത്. എല്‍ ഡിഎഫ് സര്‍ക്കാരിന്‍റെ തൊഴിലാളിക്ഷേമനടപടികളിലെ വളരെ പ്രധാന്യമര്‍ഹിക്കുന്ന ഒരു വിജയമാണ് ഇതെന്ന് ടി.പി രാമകൃഷ്ണന്‍ പറഞ്ഞു. നിയമഭേദഗതികള്‍ ഉടന്‍ പ്രാബല്യത്തില്‍ വരുത്തുന്നതിന് തൊഴിലുടമകളോടും അവകാശങ്ങള്‍ ഉറപ്പുവരുത്തണമെന്ന് തൊഴിലാളികളോടും മന്ത്രി അഭ്യര്‍ഥിച്ചിട്ടുണ്ട്. അദ്ദേഹത്തിന്‍റെ ഔദ്ധ്യോഗിക ഫോയ്സ്ബുക്കില്‍ ഇത് സംബന്ധിയായ കൂടുതല്‍ വ്യക്തത വരുത്തുന്ന കാര്യങ്ങള്‍ ഉള്‍ക്കൊള്ളിച്ചുണ്ട്.

തൊഴില്‍ മന്ത്രി ടി.പി രാമകൃഷ്ണന്‍റെ ഫെയ്സ്ബുക്ക് പോസ്റ്റിലേക്ക് ………….

ഇരിപ്പിടം അവകാശം;  നിയമഭേദഗതി പ്രാബല്യത്തില്‍

സ്ത്രീതൊഴിലാളികളുടെ അന്തസ്സും സുരക്ഷിതത്വവും ഉറപ്പുവരുത്തിയും ജോലിക്കിടയില്‍ ഇരിക്കാന്‍ അവകാശം നല്‍കിയും കേരള കടകളും വാണിജ്യസ്ഥാപനങ്ങളും നിയമത്തില്‍ സംസ്ഥാന സര്‍ക്കാര്‍ വരുത്തിയ സുപ്രധാന ഭേദഗതികള്‍ നിലവില്‍ വന്നു. ഗവര്‍ണര്‍ ഇതുസംബന്ധിച്ച ഓര്‍ഡിനന്‍സ് പുറപ്പെടുവിച്ചു.

പതിനായിരക്കണക്കിന് സ്ത്രീതൊഴിലാളികളുടെ അന്തസ്സും മനുഷ്യാവകാശങ്ങളും സംരക്ഷിക്കുന്ന തീരുമാനമാണ് സര്‍ക്കാര്‍ എടുത്തത്. തൊഴിലിടങ്ങളില്‍ ഇരിപ്പിടം ലഭിക്കുന്നില്ലെന്ന് തൊഴിലാളികള്‍ ഏറെക്കാലമായി പരാതി ഉന്നയിച്ചുവരികയാണ്. നിയമഭേദഗതിയിലൂടെ ഇരിപ്പിടം അവരുടെ അവകാശമായി മാറി.
വൈകീട്ട് ഏഴുമുതല്‍ പുലര്‍ച്ചെ ആറ് മണിവരെ സ്ത്രീകളെ ജോലി ചെയ്യിക്കരുതെന്ന നിലവിലെ വ്യവസ്ഥയില്‍ മാറ്റം വരുത്തി വൈകീട്ട് ഒമ്പതു മണി വരെ സ്ത്രീതൊഴിലാളികളെ ജോലിക്ക് നിയോഗിക്കാമെന്ന് വ്യവസ്ഥ ചെയ്തിട്ടുണ്ട്. അതോടൊപ്പം മതിയായ സുരക്ഷ, താമസസ്ഥലത്തേക്ക് യാത്രാസൗകര്യം എന്നിവ ഉറപ്പുവരുത്തിക്കൊണ്ട് രാത്രി ഒമ്പതു മണി മുതല്‍ പുലര്‍ച്ചെ ആറു മണിവരെ സ്ത്രീകളെ അവരുടെ അനുവാദത്തോടെ ജോലിക്ക് നിയോഗിക്കാം. രാത്രി ഒമ്പതിനുശേഷം രണ്ട് സ്ത്രീകള്‍ ഉള്‍പ്പെടെ അഞ്ച് തൊഴിലാളികള്‍ അടങ്ങുന്ന ഗ്രൂപ്പായി മാത്രമേ ജോലിക്ക് നിയോഗിക്കാവൂ എന്നും വ്യവസ്ഥ ചെയ്തിട്ടുണ്ട്.

 

https://www.facebook.com/tpramakrishnan/photos/a.2275586869334160/2721189474773895/?type=3&__xts__%5B0%5D=68.ARCv27jgdrxSvK4xoSMgELBkb-i_v8L1k-jyNpajJp_qpMfujwCTzP4xsrGmM02D43ws4vimx8c94Ay7lHZWZ7NiRA_X3oDMf-yUcbYLCRknjdOimj-ckfflEPW8pX4Y07c0eR9a_dROaM4g-ILsQl7r-o6yDiwUprhWaQqRjxiZZb3aTbEj9_LtPb4qUNRNpPGXlA&__tn__=-R

 

ആഴ്ചയില്‍ ഒരു ദിവസം കടകള്‍ അടച്ചിടണമെന്ന വ്യവസ്ഥ ഒഴിവാക്കി. ആഴ്ചയില്‍ ഒരുദിവസം തൊഴിലാളികള്‍ക്ക് അവധി നല്‍കണമെന്ന് വ്യവസ്ഥ ചെയ്തു. അപ്രന്‍റീസുകള്‍ ഉള്‍പ്പെടെ ഏത് സ്ഥാപനത്തിലും ജോലിചെയ്യുന്ന എല്ലാ വിഭാഗം തൊഴിലാളികളെയും ഗസറ്റ് വിജ്ഞാപനം വഴി തൊഴിലാളി എന്ന നിര്‍വചനത്തിന്‍െ പരിധിയില്‍ ഉള്‍പ്പെടുത്താന്‍ സര്‍ക്കാരിന് അധികാരം നല്‍കുന്ന വ്യവസ്ഥ നിയമത്തില്‍ ഉള്‍പ്പെടുത്തിയിട്ടുണ്ട്. ഇതിനായി തൊഴിലാളി എന്ന പദത്തിന്‍റെ നിര്‍വചനം വിപുലപ്പെടുത്തും.

നിയമലംഘനങ്ങള്‍ക്കുള്ള പിഴ നിയമഭേദഗതിയിലൂടെ വര്‍ധിപ്പിച്ചു. നിയമത്തിലെ വ്യവസ്ഥകള്‍ ലംഘിക്കുന്ന തൊഴിലുടമകള്‍ക്കുള്ള പിഴ ഓരോ വകുപ്പിനും അയ്യായിരം രൂപയില്‍ നിന്ന് ഒരു ലക്ഷം രൂപയായി വര്‍ധിപ്പിച്ചു. നിയമലംഘനം ആവര്‍ത്തിക്കുന്നവര്‍ക്ക് ചുമത്തുന്ന പിഴ പതിനായിരം രൂപയില്‍ നിന്ന് രണ്ടു ലക്ഷം രൂപയായി ഉയര്‍ത്തി. സ്ഥാപനത്തില്‍ തൊഴിലാളികളുടെ എണ്ണത്തിന്‍റെ അടിസ്ഥാനത്തില്‍ ഒരുതൊഴിലാളിക്ക് 2500 രൂപ എന്ന ക്രമത്തിലായിരിക്കും പിഴ ഈടാക്കുക. കേരള കടകളും വാണിജ്യസ്ഥാപനങ്ങളും നിയമപ്രകാരം സ്ഥാപന ഉടമകള്‍ സൂക്ഷിക്കേണ്ട രജിസ്റ്ററുകള്‍ ഇലക്ട്രോണിക് ഫോര്‍മാറ്റില്‍ സൂക്ഷിക്കാന്‍ ഉടമകള്‍ക്ക് അനുമതി നല്‍കിയിട്ടുണ്ട്.

എല്‍ഡിഎഫ് സര്‍ക്കാരിന്‍റെ തൊഴിലാളിക്ഷേമ നടപടികളിലെ സുപ്രധാന നാഴികക്കല്ലാണ്‌ ഈ നിയമഭേദഗതികള്‍. വസ്ത്രശാലകളും ജ്വല്ലറികളും റസ്റ്റാറന്‍റുകളും അടക്കമുള്ള വ്യാപാരസ്ഥാപനങ്ങളില്‍ ജോലിചെയ്യുന്ന സ്ത്രീകള്‍ അടക്കമുള്ളവരുടെ ദീര്‍ഘകാലത്തെ ആവശ്യങ്ങളാണ് ചരിത്രം കുറിച്ച നിയമഭേദഗതിയിലൂടെ അംഗീകരിക്കപ്പെട്ടത്. സ്ത്രീകള്‍ക്ക് അന്തസ്സ് ഉയര്‍ത്തിപ്പിടിച്ച് ജോലിചെയ്യാന്‍ കഴിയുന്ന തൊഴിലിടങ്ങള്‍ സൃഷ്ടിക്കുമെന്നും തൊഴിലിടങ്ങളില്‍ ലിംഗസമത്വം നടപ്പാക്കുമെന്നും എല്‍ഡിഎഫ് സര്‍ക്കാരിന്‍റെ തൊഴില്‍നയത്തില്‍ പ്രഖ്യാപിച്ചിരുന്നു.

നിയമഭേദഗതികള്‍ പ്രാവര്‍ത്തികമാക്കാന്‍ അടിയന്തരനടപടി സ്വീകരിക്കാൻ തൊഴിൽ വകുപ്പ് ഉദ്യോഗസ്ഥർക്ക് നിര്‍ദ്ദേശം നല്‍കിയിട്ടുണ്ട്‌. നിയമഭേദഗതികള്‍ ഉടന്‍ നടപ്പാക്കുന്നതിന് തൊഴിലുടമകളും ഇതനുസരിച്ചുള്ള അവകാശങ്ങള്‍ ഉറപ്പുവരുത്തുന്നതിന് തൊഴിലാളികളും മുന്നിട്ടിറങ്ങണം.