പന്തല്ലൂർ: ഒാടിക്കൊണ്ടിരുന്ന ഒാട്ടോയ്ക്ക് മുകളിലേക്ക് മരം വീണ് ഡ്രൈവർ മരിച്ചു .എരുമാടിന് സമീപത്ത് കൂളാലിൽ ഒാടിക്കൊണ്ടിരിക്കേ ഗുഡ്‌സ് ഓട്ടോയ്ക്കു മുകളിലേക്കാണ് മരം വീണത്. അപകടത്തിൽ വെള്ളച്ചാൽ പാറക്കൽ അബൂട്ടി (55) യാണ് മരിച്ചത്.
അബൂട്ടി ഗുഡ്‌സ് ഓട്ടോയിൽ വീട്ടിലേക്ക് പശുവിനെ കയറ്റി പോവുകയായിരുന്നു കൂളാൽ റോഡിലെത്തിയപ്പോൾ, അടിഭാഗം ദ്രവിച്ച കൂറ്റൻ ഗ്രാന്റീസ് മരം കാറ്റിലും മഴയിലും ഒടിഞ്ഞ് ഓട്ടോയുടെ ക്യാബിന് മുകളിലേക്കു വീഴുകയായിരുന്നു. മൃതദേഹം ബത്തേരിയിലെ സ്വകാര്യാശുപത്രിയിൽ നിന്ന് അമ്പലവയൽ താലൂക്ക് ആശുപത്രിയിലേക്ക് കൊണ്ടുപോയി.
ഇവിടെ ഒരു മാസം മുമ്പും ഇതേ പാതയിൽ മാങ്ങോട് ഒാടിക്കൊണ്ടിരിക്കുന്ന ഒാട്ടോയ്ക്കുമുകളിലേക്ക് റോഡരികിലെ ഗ്രാന്റീസ് മരം വീണ് അമ്മയും മകളും സംഭവസ്ഥലത്തുതന്നെ മരിച്ചിരുന്നു. പ്രദേശത്ത് റയോൺസ് കമ്പനിക്കുവേണ്ടി നട്ടുപിടിപ്പിച്ച മരങ്ങളാണ് അപകടമൊരുക്കുന്നത്. സംഭവത്തിൽ എരുമാട് പോലീസ് സ്ഥലത്തെത്തി കേസെടുത്തു.
Post Your Comments