എംഎസ് ധോണിക്ക് ഇത് ചരിത്രനേട്ടം; ലിസ്റ്റ് എ ക്രിക്കറ്റ് സ്റ്റംപിങില്‍ ധോണി രണ്ടാമത്

ദുബായ്: ഏഷ്യാകപ്പ് ഫൈനലില്‍ ചരിത്ര നേട്ടം സ്വന്തമാക്കി ഇന്ത്യന്‍ വിക്കറ്റ് കീപ്പര്‍ എംഎസ് ധോണി. ബംഗ്ലാദേശിന്റെ രണ്ട് ബാറ്റ്‌സ്മാന്‍മാരായ ലിറ്റണ്‍ ദാസിനെയും മൊര്‍ത്താസയെയും പുറത്താക്കി ലിസ്റ്റ് എ ക്രിക്കറ്റ് സ്റ്റംപിങില്‍ ധോണി രണ്ടാമതെത്തി. ലിറ്റണ്‍ 121 റണ്‍സും മൊര്‍ത്താസ ഏഴ് റണ്‍സുമാണ് എടുത്തത്. ലിറ്റണിന്റെ സെഞ്ചുറിക്കരുത്തില്‍ ആദ്യം ബാറ്റ് ചെയ്ത ബംഗ്ലാദേശ് 222 റണ്‍സെടുത്തിരുന്നു.

129 പേരെ പുറത്താക്കിയ എസ് റോഡ്സിനെ പിന്തള്ളിയ ധോണി തന്റെ നേട്ടം 131ലെത്തിച്ചു. എന്നാല്‍ 138 പേരെ പുറത്താക്കിയ മൊയിന്‍ ഖാനാണ് ഒന്നാമത്. തകര്‍പ്പന്‍ സെഞ്ചുറി നേടിയ ലിറ്റണെ 41-ാം ഓവറില്‍ കുല്‍ദീപിന്റെ പന്തിലാണ് ധോണി പറഞ്ഞയച്ചത്. കുല്‍ദീപിന്റെ തന്നെ ഗൂഗ്ലിയില്‍ 43-ാം ഓവറില്‍ ബംഗ്ലാ നായകന്‍ മൊര്‍ത്താസയുടെ സ്റ്റംപും ധോണി തെറിപ്പിച്ചു.