തിരുവനന്തപുരം•പ്രളയത്തെത്തുടര്‍ന്ന് സംസ്ഥാനം ഇന്ധനക്ഷാമത്തിലേക്ക് എന്ന വാര്‍ത്തകള്‍ അടിസ്ഥാന രഹിതമെന്ന് ഇന്ധനകമ്പനികള്‍. കൊച്ചി ഇരുമ്പനം പ്ലാന്റില് നിന്ന് ഇന്ധനനീക്കം സാധന ഗതിയില്‍ നടക്കുന്നതിനാല്‍ വരും ദിവസങ്ങളില്‍ ഇന്ധന ക്ഷാമത്തിന് യാതൊരു സാധ്യതയുമില്ലെന്ന് ഇന്ത്യന്‍ ഓയില്‍ കോര്‍പ്പറേഷന്‍ തിരുവനന്തപുരം ഡിവിഷണല്‍ ഓഫീസര്‍ അറിയിച്ചു.
പ്രളയത്തില്‍ കേടുപാടുകള്‍ പറ്റിയ 150 ഓളം പമ്പുകളിലാണ് ഇന്ധനം നിറയ്ക്കാന്‍ കഴിയാത്തത്. തൃശൂര്‍ മുതല്‍ തിരുവനന്തപുരം വരെയുള്ള പമ്പുകളില്‍ കൊച്ചിയില്‍ നിന്നാണ് ഇന്ധനം എത്തിക്കുന്നത്. ഇന്നും തിരുവനന്തപുരം ഉള്‍പ്പടെയുള്ള സ്ഥലങ്ങളിലേക്ക് ലോഡുകള്‍ അയച്ചിട്ടുണ്ടെന്നും ഡിവിഷണല്‍ ഓഫീസര്‍ പറഞ്ഞു.
നിലവിലെ സാഹചര്യത്തില്‍ പെട്രോളിയം ഉത്പന്നങ്ങള്‍ക്ക് ക്ഷാമം അനുഭവപ്പെടാനുള്ള സാധ്യത കുറവാണ്. കൊച്ചി പ്ലാന്റില് നിന്നും പാലക്കാട്ടേയ്ക്കും ഇടുക്കിയിലെ ചില സ്ഥലങ്ങളിലേയ്ക്കും ഇന്ധനം കൊണ്ടുപോകുന്നതിനു തടസം നേരിട്ടിരുന്നു. പാലക്കാട്ടേയ്ക്ക് പോകുന്ന റോഡില്‍ വെള്ളം കയറിയതിനെ തുടര്‍ന്ന് ഗതാഗതം സ്തംഭിച്ചപ്പോള്‍ കോയന്പത്തൂര്‍ പ്ലാന്റില് നിന്നും ഇന്ധനം എത്തിച്ചു.
അതേസമയം, ഇന്ധന ക്ഷാമം ഉണ്ടാകാന്‍ പോകുന്നുവെന്ന വാര്‍ത്ത തിരുവനന്തപുരം നഗരത്തില്‍ പരിഭ്രാന്തി പരത്തി. നഗരത്തിലെ പമ്പുകളില്‍ പെട്രോള്‍ അടിക്കാന്‍ ആളുകളുടെ നീണ്ടനിരയാണ് കാണുന്നത്.
അതിനിടെ, ഇന്ധന ലഭ്യത ഉറപ്പുവരുത്താന്‍ എല്ലാ പെട്രോളിയം കമ്പനികളും ശ്രദ്ധിക്കണമെന്ന് മുഖ്യമന്ത്രി പിണറായി വിജയന്‍ ആവശ്യപ്പെട്ടു.
Post Your Comments