സിബിഎസ്ഇ പ്ലസ്ടു പരീക്ഷ തോറ്റതിന് പിന്നാലെ വിദ്യാര്‍ത്ഥിയെ കാണാതായി

ഗസിയാബാദ്: സിബിഎസ്ഇ പ്ലസ്ടു പരീക്ഷ ഫലം ഇന്നലെയാണ് പുറത്തെത്തിയത്. പരീക്ഷയില്‍ തോറ്റ ഒരു വിദ്യാര്‍ത്ഥിയെ ഫലം പുറത്തെത്തിയപ്പോള്‍ മുതല്‍ കാണാനില്ല. ഗസിയാബാദിലെ ലോഹിയ നഗറില്‍ താമസമാക്കിയ അര്‍ണബ് ഗോയല്‍ എന്ന 17കാരനെയാണ് കാണാതായത്. കുട്ടിയെ കാണാനില്ലെന്ന് പിതാവ് പിയുഷ് ഗോയലാണ് പരാതി നല്‍കിയിരിക്കുന്നത്.

പ്ലസ്ടുവിന് സയന്‍സായിരുന്നു അര്‍ണബ് പഠിച്ചിരുന്നത്. അര്‍ണബ് ഉച്ചക്ക് ഒരുമണിയോട് കൂടിയാണ് കാണാതായത്. പത്താം ക്ലാസില്‍ പഠിക്കുന്ന സഹോദരിയായ കൃതി ഗോയലിനെ വിളിച്ച് പരീക്ഷാഫലം പുറത്തെത്തിയ വിവരം അര്‍ണബ് അറിയിക്കുകയും വീട് വിട്ട് പോവുകയുമായിരുന്നു.

also read: സിബിഎസ്ഇ പരീക്ഷാഫലം പ്രസിദ്ധീകരിച്ചു

കുറച്ച് സമയത്തിന് ശേഷം അര്‍ണബ് തിരികെ എത്തുമെന്നാണ് കരുതിയത്. എന്നാല്‍ വൈകുന്നേരം ആയിട്ടും കുട്ടി തിരികെ എത്തിയില്ല. തുടര്‍ന്നാണ് പരാതി നല്‍കിയതെന്ന് അര്‍ണബിന്റെ പിതാവ് പറഞ്ഞു. വീട് വിട്ട് പോകുന്നതിന് മുമ്പ് പരീക്ഷയുടെ മാര്‍ക്ക് ഷീറ്റ് വലിച്ചുകീറിയിട്ടാണ് കുട്ടിപോയത്. സംഭവത്തില്‍ പോലീസ് കേസ് റജിസ്റ്റര്‍ ചെയ്ത് അന്വേഷണം തുടങ്ങിയിട്ടുണ്ട്.