കന്നഡ ജനത ആര്‍ക്കൊപ്പം? പുതിയ ഇന്ത്യ ടുഡേ സര്‍വേ ഫലം പറയുന്നത് ഇതാണ്

ബെംഗളൂരു•മേയ് 12 ന് നടക്കാനിരിക്കുന്ന കര്‍ണാടക നിയമസഭാ തെരഞ്ഞെടുപ്പില്‍ കോണ്‍ഗ്രസും ബി.ജെ.പിയും ഒപ്പത്തിനൊപ്പമെന്ന് സൂചന നല്‍കി പുതിയ സര്‍വേ ഫലം. കര്‍ണാടകയില്‍ തൂക്ക് മന്ത്രിസഭയായിരിക്കും നിലവില്‍ വരികയെന്ന മുന്‍ സര്‍വേകള്‍ ശരിവയ്ക്കുന്നതാണ് ചൊവ്വാഴ്ച പുറത്ത് വന്ന ഇന്ത്യ ടുഡേ-കര്‍വി സര്‍വേ ഫലവും.

കോണ്‍ഗ്രസിന് 90 മുതല്‍ 101 സീറ്റുകള്‍ വരെ ലഭിക്കുമെന്ന് ഇന്ത്യ ടുഡേ സര്‍വേ പറയുന്നു. ബി.ജെ.പിയ്ക്ക് 78 മുതല്‍ 86 സീറ്റുകള്‍ വരെ ലഭിക്കും. 34-43 സീറ്റുകള്‍ നേടുന്ന ജെ.ഡി.എസ് സഖ്യം അധികാരം നിര്‍ണ്ണയിക്കുന്നത്തില്‍ നിര്‍ണ്ണായക ശക്തിയാകുമെന്നും സര്‍വേ പറയുന്നു. മറ്റുള്ളവര്‍ 4 മുതല്‍ 7 സീറ്റുകള്‍ വരെ നേടും.

കോണ്‍ഗ്രസിന്റെ വോട്ട് വിഹിതം 39% ആയിരിക്കും. ബി.ജെ.പി 38% വോട്ടുകള്‍ വരെ നേടും. ജെ.ഡി.എസ് 15% ഉം മറ്റുള്ളവര്‍ എട്ടുശതമാനം വോട്ടുകള്‍ നേടുമെന്നും സര്‍വേ പ്രവചിക്കുന്നു.